Muarem Muarem: PAOK-la səfər matçında hər şey fərqli olacaq
"Qarabağ"ın yarımmüdafiəçisi Muarem Muarem Avropa Liqasının qrup mərhələsi çərçivəsində Yunanıstan PAOK-una qalib gəldikləri oyundan (2:0) sonra azerisport.az saytının suallarını cavablandırıb:
- Matçla bağlı fikirləriniz...
- Bizim üçün son dərəcədə vacib qarşılaşma idi. Yenə uduzsaydıq, qrupdan çıxmaq şanslarımız minimuma enəcəkdi. Amma biz bu oyuna pozitiv köklənmişdik. Oyundan öncə də, oyun zamanı da çox sakit və təmkinli idik. Şadam ki, matçı qələbə ilə başa vurduq. Artıq önümüzə baxmalıyıq.
- Siz hücumlar zamanı tez-tez topu itirirdiniz. Bu, nə ilə bağlı idi?
- Nəyisə çox istəyəndə, belə hallar olur. Qol vurmağı çox istəyirdim. Amma buna nail ola bilməsəm də, qol ötürməsi verdim. Komandama kömək etməyi bacardım.
- Matçın əvvəlində yüz faizli qol epizodundan yararlana bilməməyinizə nə səbəb oldu?
- Həmin anda sağ ayaqla zərbə vurmalı idim. Amma top sol ayağıma gəldi və istədiyim kimi zərbə vura bilmədim.
- Ot örtüyü mane olmurdu?
- Ot örtüyünün nəyəsə mane olduğunu deməzdim. Sadəcə, meydanın müəyyən hissələrində qopmalar var idi.
- Reynaldo ilə Migel Maderanın yoxluğu çox hiss olunurdu?
- Bəli. Amma yaxşı ki, onları layiqincə əvəz edə bildik.
- Yunanlarla səfərdə keçiriləcək cavab oyununda necə olacaq?
- Qələbə qazanmaq istəyirik. Amma heç-heçə də pis nəticə olmayacaq.
- Artıq PAOK-u daha yaxşı tanıyırsınız. Cavab matçında da qalib gəlmək üçün nə etmək lazımdır?
- Öz oyunumuzu daha da yaxşılaşdırmalıyıq. Yunanıstanda hər şey tam fərqli olacaq. Onlar daha aqressiv çıxış edəcəklər, daha çox hücum edəcəklər. Bütün bunlara hazır olmalıyıq.
