Rahid Əmirquliyev: PAOK ötən mövsümlə müqayisədə daha güclüdür
"Qarabağ"ın yarımmüdafiəçisi Rahid Əmirquliyev Avropa Liqasının qrup mərhələsi çərçivəsində Yunanıstan PAOK-una qarşı keçirəcəkləri oyun öncəsi azerisport.az saytının suallarını cavablandırıb:
- Avroliqadakı son matçınızda "Fiorentina"ya 1:5 hesablı məğlubiyyət bu görüşdəki çıxışınıza təsir göstərə bilər?
- İtalyanlarla oyun bizim üçün çox uğursuz alındı. Amma futbolda belə hallar olur. İrəli baxmaq lazımdır. Bizi maraqlı oyun gözləyir. "Fiorentina"ya məğlubiyyəti unutdurmaq üçün qələbə qazanmaq istəyirik.
- "Qarabağ"ı bu oyunun favoriti saymaq olar?
- Şanslarımızın bərabər olduğunu düşünürəm. Çünki PAOK da yaxşı komandadır.
- Rəqib barədə nə bilirsiniz?
- Rəqibi kifayət qədər yaxşı analiz etmişik. Onların zəif və güclü cəhətlərini yaxşı bilirik.
- PAOK ötən mövsüm "Qəbələ" ilə də qarşılaşmış və iki oyunda qolsuz heç-heçəyə razılaşmışdı. Siz həmin oyunlara baxmışdınız?
- Əlbəttə. "Qəbələ" həmin oyunların hər ikisində layiqli mübarizə aparmışdı.
- Yunanlarla oyunlar ardıcıl olacaq. Bu görüşlərdən neçə xalla ayrılmağı hədəfləmisiniz?
- Hələ ki, bütün diqqətimiz qarşıdakı oyuna yönəlib. Cavab oyunu barədə sonra düşünəcəyik. İndi vacib olan Bakıdakı görüşə maksimum köklənib, qalib gəlməkdir.
- Razısınız ki, "Qarabağ"ın qrupdan çıxması PAOK-la oyunlardan birbaşa asılıdır?
- Yalnız bu oyunlardan asılı olduğunu deməzdim. Çünki ondan sonra daha iki oyunumuz olacaq. Amma aydın məsələdir ki, yunanlarla görüşlərin statusu böyükdür.
- Ansi Aqolli bu qrupun favoriti kimi "Fiorentina" ilə PAOK-un adını çəkib...
- Ola bilər. Amma məncə, biz bu qrupda istənilən rəqibə qarşı layiqli oyun sərgiləyə bilərik. Qrupdan çıxmaq üçün qalan oyunlardan maksimum nəticə ilə ayrılmaq istəyirik.
- PAOK-un heyətinə kimi xüsusi qeyd edərdiniz?
- Kimisə fərqləndirmək istəməzdim. Rəqib yaxşı komandadır. Ola bilsin ki, onlar bu mövsüm əvvəlkindən də güclüdürlər. Əbəs yerə deyil ki, onlar son dövrlər məğlubiyyət tanımırlar.
- Bu klubun yeni prezidenti komandanın qarşısına "Qarabağ"ı hər iki oyunda məğlub etmək vəzifəsi qoyub...
- Onun komanda üçün belə bir hədəf müəyyənləşdirdiyini bilmirdim. Amma biz buna fikir verməməliyik. İstərdim ki, bu gün biz qalib gələk və azarkeşlərimizi sevindirək.
