Millimizin rəqibi baş məşqçisini saxlamağa qərar verdi

Azərbaycan yığmasının DÇ-2018-in seçmə mərhələsindəki rəqiblərindən olan Norveçdə baş məşqçi Per-Matias Hoqmonun istefası gündəmdə idi. Azerisport.az xəbər verir ki, bu komandanın xüsusilə Bakıdakı 0:1 hesablı məğlubiyyətindən sonra bu mütəxəssisə qarşı təzyiqlər çoxalmışdı.

Amma Norveç Futbol Federasiyasının rəhbərliyi bununla bağlı keçirdiyi iclasda fərqli qərar qəbul edib. Belə ki, norveçlilər noyabrın 11-də keçiriləcək oyunda da komandanı meydana Hoqmonun çıxarmasına qərar veriblər. Amma həmin görüşün nəticəsindən asılı olmayaraq, NFF bu ilin sonunda yenidən bu məsələyə qayıdacaq və baş məşqçi məsələsi ilə bağlı ətraflı götür-qoy edildikdən sonra qərar veriləcək. İstisna edilmir ki, Hoqmonun istefası da məhz bu ilin sonunda gerçəkləşsin.