Ansi Aqolli: Fiorentina və PAOK qrupumuzun əsas favoritləridir
"Qarabağ"ın müdafiəçisi Ansi Aqolli Avropa Liqasının qrup mərhələsi çərçivəsində Yunanıstanın PAOK klubuna qarşı keçirəcəkləri oyun öncəsi fikirlərini bölüşüb. Azerisport.az xəbər verir ki, o, bunları söyləyib:
"Son dövrlər yaxşı vəziyyətdəyik, yaxşı oyun sərgiləyirik, meydanda inamlı təsir bağışlayırıq. Amma qeyd etmək lazımdır ki, rəqibimiz PAOK da çox yaxşı komandadır. Yunanıstanın ən yaxşı klublarından biri hesab olunur. Bu, bir daha nə dərəcədə çətin bir qrupda yer aldığımızın göstəricisidir".
Albaniya yığmasının da şərəfini qoruyan təcrübəli futbolçu bəyan edib ki, o, PAOK-u əslində pis tanımır: "Əslində, mən özüm PAOK-u yaxşı tanıyıram. Bunun əsas səbəbi Erqyus Kaçenin (Albaniya yığmasındakı komanda yoldaşı) bu kluba məxsus olmasıdır (hazırda Çexiyanın "Viktoriya" klubunda icarə əsasında oynayır). PAOK sürətli futbol sərgiləyir. Yaxşı hücumlar qurmağı bacaran komandadır. Amma istənilən halda hər şeyə meydanda aydınlıq gələcək".
Aqollinin sözlərinə görə, bu qrupun iki aşkar favoriti var: "Etiraf edim ki, "Fiorentina" və PAOK qrupumuzun əsas favoritidir. Amma futbolda sürprizlər də olur. Bizim üçün də belə sürprizlərə imza atmaq çox xoşdur".
Ağdam klubunun legioneri sonra bunları qeyd edib: "Bizim üçün daxili çempionatda və Avroliqada matça çıxmaq arasında ciddi fərq yoxdur. Bütün oyunlarımıza ciddi yanaşırıq. PAOK-la oyun da həm bizim, həm də azarkeşlərimiz üçün böyük əhəmiyyət daşıyır. Tribunalardan yaxşı dəstək gözləyirəm. Çünki PAOK-la bizi ardıcıl iki vacib oyun gözləyir". (PAOK24.com)
