Elnur Cəfərov: Xorvatiyada millimizin uğurlu çıxışını izləmək çox xoşdur

Xorvatiyanın "Duqopolye" klubunun yarımmüdafiəçisi Elnur Cəfərovun azerisport.az saytına müsahibəsi

- Xorvatiya klubunda işləriniz necə gedir?
- Baş məşqçi hər oyunda mənə şans verir. Əvvəllər 20 dəqiqə sınayırdı. Sonradan yarım saata çevirdi. Son matçlarda isə 45 dəqiqə oynadır. Oyundan oyuna artırmağa çalışıram. Son oyunda da start heyətdə meydana buraxdı.

- "İmotski" ilə oyunda fasilədə niyə əvəzləndiniz?
- Bilmirəm. Baş məşqçinin qərarıdır. Hələ ki, məni 45 dəqiqədən artır oynatmırlar (gülür). Baş məşqçi deyir ki, bir, maksimum iki aya komandaya tam uyğunlaşacağam və o zaman 90 dəqiqə oynaya bilərəm. Onu da unutmaq lazım deyil ki, 8 ay idi futbol oynamırdım.

- Bəs oradakı yaşayışınız necədir?
- Hər şey yaxşıdır. Hələ ki, tam uyğunlaşmağa çalışıram. Mənim bu klubla müqaviləmin müddəti mövsümün sonuna kimidir. Burada oyun təcrübəmi daha da artırmaq üçün yaxşı imkanım var.

- Liderlər qrupunda qərarlaşan "Duqopolye"nin elitaya çıxmaq şansı var?
- Niyə də yx? Heyətimiz tamamilə gənclərdən ibarətdir. Cəmi 3-4 təcrübəli oyunçu var. Möhkəm komandadır. Hər oyunda daha da yaxşı çıxış etməyə çalışırıq. Qarşımıza hədəf qoyulub və ona doğru irəliləyirik.

- Milli komandamızın DÇ-2018-in seçmə mərhələsindəki çıxışı barədə nə deyə bilərsiniz?
- Millimiz tarix yazdı. Uşaqlara halal olsun. Hər üç seçmə mərhələ matçımıza baxmışam. Həyəcan ən yüksək həddə idi. Xaricdən komandamızın uğurlu çıxışını izləmək çox xoşdur. Azərbaycan yığması ilə fəxr etdim.

- Yığma komandamızı Robert Prosineçkinin çalışdırdığını nəzərə alsaq, Xorvatiyada bu qələbələrimizi necə qarşıladılar?
- Xorvatiyada Prosineçkini çox sevirlər. Çexiya ilə oyundan sonra məşqə gedən komanda yoldaşlarım məni təbrik etdilər. Bizimkilərin üç oyuna 7 xal toplamasından danışırdılar, tərifləyirdilər. Amma bütün bunların Prosineçkinin sayəsində olduğunu da xüsusi qeyd edirdilər. Xorvatlar da məşqçilərinin belə uğur qazanmasına sevinirlər.