Denilson: Qarabağdan da güclü rəqiblərə qalib gələ bilərik
"Neftçi"nin hücumçusu Denilson Pereyra Topaz Premyer Liqasının 8-ci turu çərçivəsində "Zirə"yə qarşı oyundan (0:2) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Niyə "Neftçi"nin oyunları alınmır?
- Komandamız kompakt oynamırdı. Əslində matça pis başlamamışdıq. Amma sonradan konsentrasiyanı itirdik.
- Sizdə heç nə alınmır. Səbəb nədir?
- Futbol komanda oyunudur. "Neftçi"nin bəzi futbolçuları konsentrasiyanı itirdi. Hər şey planlaşdırdığımız kimi alınmadı. Hər şeyin yaxşı alınması üçün bütün futbolçuların eyni nöqtəyə vurması lazımdır. Futbolçuların hansısa relsdən çıxırsa, oyunun alınmaması da təbiidir.
- Yeni baş məşqçi də gəldi, komanda yenə uduzur. Bəlkə elə əsl günahkar futbolçulardır...
- Futbolçular meydanda lazım olan formada oynamırlarsa, Qvardiolanı da gətirsən, xeyri heç nə dəyişən deyil. Nəticə olmayacaq.
- Qapınıza penalti təyin olundu, futbolçunuz meydandan qovuldu. Hakimlikdən razı qaldız?
- Hakimlik barədə pis heç nə deyə bilmərəm. Yaxşı çalışdılar.
- Qarşıda sizi "Qarabağ", "Qəbələ" və "İnter"lə oyunlar gözləyir. Bu üç liderlə görüşdə nəyə ümid edirsiniz?
- Futbol səhvlər üzərində qurulmuş oyundur. Qələbə qazanmaq üçün rəqibin səhvlərindən yararlanmalıyıq. "Qarabağ"dan da güclü rəqiblərə qalib gəlmək olar. Bunun üçün sadəcə, onun buraxdığı səhvlərdən maksimum yararlanmaq lazımdır. Ola bilər ki, ağdamlılar da elə səhvlərə yol versinlər və biz onlardan istifadə edib, qalib gələk.
