Asif Məmmədov: Heç-heçə ədalətli nəticə oldu
"Qəbələ"nin yarımmüdafiəçisi Asif Məmmədov Topaz Premyer Liqasının 8-ci turu çərçivəsində "İnter"ə qarşı keçirdikləri oyundan (1:1) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Oyunla bağlı nə deyə bilərsiniz?
- Çətin oyun oldu. Matçın gedişində məğlub duruma düşsək də, bərabərlik qolunu vura bildik. "İnter Arena"nın süni örtüyündə oynamaq çətin idi. Xüsusilə də Qəbələdəki ot örtüyündə oynadıqdan, məşq etdikdən sonra. Təbii ot örtüyündə oynasaydıq, hər şey fərqli ola bilərdi.
- "Qəbələ" bu oyunda iki futbolçusunu itirdi...
- Elə bu cür zədələrə görə belə meydançalardan imtina olunsaydı, yaxşı olardı. Futbol üçün bu, çox təhlükəlidir. Mən təxminən səkkiz il burada oynamışam. Hər iki aydan bir zədə alırdım. Şükür Allaha ki, "Qəbələ"də belə problem yoxdur.
- Bu oyunda həm də cari mövsümdə ilk dəfə qapınızda qol gördünüz...
- Nə vaxtsa qol buraxmalı idik. Bu da "İnter"lə oyuna təsadüf etdi.
- Bu mövsüm hələ ki, yalnız "İnter"lə oyunlarınız alınmır. Onlarla ilk dövrədəki oyununuz da heç-heçə bitmişdi.
- Həmin oyunda qalib gəlməli idik. Lakin çoxsaylı qol şansını boşa verdik. Hətta penaltini də vura bilmədik. Bu oyunda da pis çıxış etmədik. Xüsusilə də ikinci hissədə. Mən "İnterlə səfərdəki heç-heçəni pis nəticə saymıram.
- Sizə elə gəlmir ki, rəqib daha yaxşı təsir bağışlayırdı və qələbəyə də yaxın idi?
- Elə deməzdim. Nəticə oyuna görə oldu.
- Bu mövsüm pis çıxış etmirsiniz. Robert Prosineçkinin sizi milliyə dəvət edəcəyinə ümidiniz var idi?
- Əlbəttə. Bütün futbolçular kimi, mən də yığmada oynamaq istəyirəm. Amma DÇ-2018-in son seçmə oyunlarına dəvət almadığım üçün məyus oldum.
