Araz Abdullayev: Millinin son nəticələri göstərdi ki, biz də oynaya bilirik

"Neftçi"nin yarımmüdafiəçisi Araz Abdullayevin azerisport.az saytına müsahibəsi

- DÇ-2018-in seçmə mərhələsi çərçivəsində Çexiyaya qarşı keçirdiyiniz səfər oyunu ilə bağlı nə deyə bilərsiniz?
- Çexiyanı Avropanın ən yaxşı komandalarından biri adlandırardım. Buna baxmayaraq, onlara qarşı səfər oyununda müsbət nəticə qazanmağı bacardıq. Öz gücümüzə inanırdıq. Əmin idik ki, bu oyundan xalla qayıda bilərik. Mən son dəqiqələrdə meydana çıxdım. Komandamızın səfərdən xalla qayıtması üçün kömək etməyə çalışdım.

- Meydana çıxarkən baş məşqçinin sizə hansı tapşırıqlar verdiyini bilmək olar?
- Komandamızın əks-hücumlar qurmasına kömək etməli idim. Baxmayaraq ki, son dəqiqələrdə hesabı qorumağımız da önəmli idi. Fikrimcə, bütün futbolçular öz tapşırıqlarının öhdəsindən lazımınca gəldi.

- Millimiz üç oyundan sonra 7 xal toplayıb, qol buraxmayıb. Azərbaycan yığması artıq seçmə mərhələnin ən sürpriz komandası hesab olunur...
- Elədir. Bu cür uğur qazanacağımıza çox az adam inanırdı. Komandamızda özünəinamın artması, rəqiblərimizdən heç də pis təsir bağışlamamağımız gözəldir. Bu, onu göstərir ki, biz də oynaya bilirik.

- Noyabrda millimizi daha bir çətin səfər - Şimali İrlandiya ilə oyun gözləyir. Yenə sürpriz nəticə gözləyək?
- Yenə döyüşkən xüsusiyyətlərimizi göstərməyə çalışacağıq. Son zamanlar bu, bizdə heç də pis alınmır.

- Yəqin ki, yığmadan klubunuzun düşərgəsinə yaxşı əhval-ruhiyyə ilə qayırdınız...
- Əlbəttə. Yığmada uğur qazananda istər-istəməz, kluba daha inamlı şəkildə qayıdırsan. Ümid edirəm ki, belə uğurlu çıxış həm yığmada, həm də komandamızda davamlı olacaq.

- Qışda sizin Avropa klublarından birinə keçəcəyiniz barədə yayılan məlumatlar nə dərəcədə doğrudur?
- Bunu indicə sizdən eşidirəm. Hələ heç nə yoxdur.