Qara Qarayev: Almaniya ilə yox, özümüzlə rəqabət aparırıq

Futbol üzrə Azərbaycan yığmasının yarımmüdafiəçisi Qara Qarayev DÇ-2018-in seçmə mərhələsi çərçivəsində Çexiyaya qarşı oyundan (0:0) sonra azerisport.az saytının suallarını cavablandırıb:

- Matçla bağlı nə deyə bilərsən?
- Norveçlə oyundan sonra yaxşı ab-hava var idi. Bunu qorumağa çalışırdıq. Ağır oyun oldu. Əsas odu ki, xal qazandıq.

- Qarşılaşmanın ilk dəqiqələrində həyəcanlı görünürdün...
- Xeyr, həyəcan yox idi. Sadəcə, komanda yoldaşlarıma daha çox paslaşıb, topu özümüzdə saxlamaq istəyirdik. Bəzi səhlər oldu. Fikrimcə, normal idi, amma etməməliydim.

- Havanın yağışlı olması bizə, yoxsa rəqibə sərf etdi?
- Bu, tempin sürətli olmasına şərait yaradırdı. Biz də dayanmırdıq. Havanın soyuq olması daha çox qaçmağımıza səbəb olurdu.

- Azərbaycanın müdafiəsini Avropada ən etibarlılardan saymaq olar?
- Belə düşünmürəm. Son iki oyunda bəxtimiz də gətirdi. Düzdü, əziyyət çəkmişik, amma təkəbbürlüyə ehtiyac yoxdu. Bəzən elə epizodlar olurdu ki, rəqib real şansdan yararlana bilmirdi.

- 3 oyuna 7 xal gözləyirdin?
- Açığı, mənim üçün surpriz oldu. Kiçik də olsa, bu da bir uğurdur.

- Almaniya qalib gəlib, vahid liderliyə yüksəldi. Təəssüflənirsiniz?
- (gülür) Biz də komanda yoldaşlarımızla zarafat edirdik ki, Almaniyanı özümüzdən irəli buraxdıq. Amma sözsüz, Almaniyanın gücü hamıya bəllidi. Biz onlarla rəqabətə çıxmamışıq, özümüzlə rəqabət aparırıq. Daha da çox inkişaf etmək, nəticə qazanmaq istəyirik.