Maksim Medvedev: İkinci pillədə sonadək qalmaq şansımız var

Futbol üzrə Azərbaycan yığmasının müdafiəçisi Maksim Medvedev DÇ-2018-in seçmə mərhələsi çərçivəsində Çexiyaya qarşı səfər oyunundan (0:0) sonra azerisport.az saytının suallarını cavablandırıb:

- Matçla bağlı nə deyə bilərsiz?
- Yaxşı oynadıq. Matça heç bir təzyiq hiss etmədən çıxmışdıq. Buna görə də futbolçular meydanda təşkilatlanmış, ağıllı oyun sərgilədilər. Çexlərin güclü tərəflərini bilirdik, buna qarşı tədbirlər görürdük. Bu da pis alınmadı. Eyni zamanda özümüz də hücumlar edirdik. Bir neçə yaxşı əks-hücumumuz oldu. Ancaq təəssüf ki, onları qola çevirə bilmədik. Bir xal qazandıq. İndiki məqamda bu bir xal da bizim üçün çox vacibdir. Bu heç-heçə növbəti matçlarımızda həlledici rol oynaya bilər.

- Matçın ilk 5-10 dəqiqəsini çıxmaq şərtilə, çexlərin elə də qorxulu olmadığını demək olar?
- Onlar doğma meydanda oynayırdılar. Ola bilsin ki, özlərinə güvənirdilər. Yəqin ki, bizim Norveçlə oyunumuzu da izləmişdilər. Hətta baş məşqçiləri də demişdi ki, Azərbaycanın oyunu bizi təəccübləndirmədi və onlardan çəkinmirik. Amma futbolda hər şey olur. Rəqibi düzgün qiymətləndirmək lazmdır. Qarşındakı rəqibin kim olmasından asılı olmayaraq, bütün oyunlara eyni hazırlaşmalısan.

- Bu oyunda qazandığınız bir xalın həlledici olacağını deməklə nəyi nəzərdə tutursunuz?
- Geridə cəmi 3 oyun qalıb ki, onların ikisini səfərdə keçirmişik. Evdə daha çox oyunumuzun qaldığını nəzərə alsaq, daha çox xal toplaya bilərik. Mənim üçün Norveç, Çexiya və Şimali İrlandiya eyni gücdə olan komandadır. Bu komandalar çox xal itirsələr, bizim üst pillələrdə qalmaq şansımız var.

- Artıq Azərbaycanın qrup ikinciliyi uğrunda mübarizə aparacağını söyləmək olar?
- Şans var. Hətta nəzəri cəhətdən birinci yerə də iddia edə bilərik. Amma biz elə oyun sərgiləməliyik ki, təckə müdafiə olunmayaq, hücum edib, qol vurmaq da lazımdır. Fikrimcə, hücumda daha effektli oynamağı bacarsaq, növbəti oyunlarda daha çox xal toplamağımız realdır.

- Müdafiədə itkilərin olmasına baxmayaraq, komandamız üç oyundur qol buraxmır...
- Mən çexlərlə heç-heçədən daha çox qol buraxmamağımıza sevinirəm. Müdafiə xəttimizdə çıxış edən futbolçular "Qarabağ" və "Qəbələ"nin heyətində beynəlxalq təcrübəyə də malikdir. Bu, bizə çox kömək edir. Hətta balacaboy Mirzəbəyovla Daşdəmirov da rəqibə topla istədiyi kimi oynamağa imkan vermir. Bu da qol buraxmamağımıza kömək edir.