Qara Qarayev: Bizim daha güclü rəqiblərlə matçlarımız hələ qarşıdadır

Futbol üzrə Azərbaycan yığmasının yarımmüdafiəçisi Qara Qarayev DÇ-2018-in seçmə mərhələsi çərçivəsində Çexiyaya qarşı oyun öncəsi azerisport.az saytının suallarını cavablandırıb:

- Norveç üzərində qələbəni (1:0) komandamız xüsusi bayram etdi. Bu, indiyə qədər belə böyük uğurlarımızın olmamasından irəli gəlirdi?
- Ola bilsin ki, bu oyunda çox güc sərf etdiyimizə və ya bizə az adam inandığına görə idi.

- San Marinoya da çətinliklə qalib gəlmişdiniz, Norveçlə qarşılaşmada da parlaq futbol sərgiləmədiniz. Sizə elə gəlmir ki, inamsızlıq bundan qaynaqlanır?
- Razıyam. Amma istənilən halda biz bu oyunlarda nəticə qazanmağı bacardıq. Fikrimcə, bundan sonra bizə daha çox inanan olacaq. Əsas məsələ bu mərhələni eyforiyasız keçməkdir. Onu da nəzərə almalıyıq ki, qrupdakı daha güclü rəqiblərlə oyunlarımız hələ qarşıdadır.

- Bu, nəyisə dəyişir?
- Özümüzü aldatmamalıyıq. San Marinodan başqa bütün rəqiblərimiz bizdən güclüdür. Bu komandalardan birinə doğma meydanda qalib gəlməyimiz sevindiricidir. Necə çətin qrupa düşdüyümüzü də məhz indi anlamağa başlamışıq.

- Komandamız bu oyuna necə hazırlaşıb?
- Yəqin ki, futbolçularda hansısa eyforiya olduğunu hiss etməmisiz. Amma uşaqlarda öz güclərinə inam var. Bu, nəyə desən dəyər. Güclü rəqibə qarşı layiqli mübarizə aparmağa çalışacağıq. Onlar əvvəlki oyunlarda 5 xal itiriblər. Bu üzdən də ilk qələbələrini qazanmağa çalışacaqlar.

- Razısız ki, Çexiya ilə oyunda Norveçlə matçdakı taktika ilə oynamağımız sizə uğur gətirməyə bilər?
- Bunu oyun göstərəcək. Hücumda daha fəal olmalı, diqqətli oynamalıyıq.

- Oyundan öncə sizin meydana çıxmayacağınızı, amma matçın heç-heçə bitəcəyini desələr, razılaşarsınız?
- Bu, bizim üçün əsl hədiyyə olardı (gülür). Üç oyuna yeddi xal sadəcə, super olar. Amma heç kim bizə belə hədiyyə edən deyil. Meydana çıxıb, əziyyət çəkib, uğur qazanmağa çalışmalıyıq.