Eddi İsrafilov: Çexiyaya səfərdə qalib gələ bilərik
Futbol üzrə Azərbaycan yığmasının və İspaniyanın "Kadis" klubunun yarımmüdafiəçisi Eddi İsrafilov DÇ-2018-in seçmə mərhələsi çərçivəsində Çexiyaya qarşı oyun ərəfəsində azerisport.az saytının suallarını cavablandırıb.
- Çexiyaya hansı əhval-ruhiyyədə gəlmisiz?
- Şübhəsiz ki, Norveç üzərindəki qələbədən sonra komandamızda atmosfer çox yaxşıdır. Seçmə mərhələyə uğurlu start verməyimiz komandada özünəinamı daha da artırır. Adətən, belə hallarda növbəti oyunlara hazırlaşmaq daha asan olur. Bu tempdə də davam etmək istəyirik.
- Norveçə qarşı sərgilədiyiniz oyundan razı qaldınız?
- Mən ayrıca öz oyunuma qiymət vermək istəmirəm. Amma komandamız meydanda hər şeyi düz etdi. Sona qədər çalışdıq. Meydandakı hər futbolçu yaxşı təsir bağışladı. Hər halda başqa cür Avropanın az qala ən yaxşı komandalarından birinə qalib gələ bilməzdik.
- Azarkeşlərin də Bakıdakı oyuna marağı az deyildi. Onların dəstəyi barədə nə deyə bilərsiniz?
- İtaliya ilə oyunda Bakı Olimpiya Stadionuna daha çox azarkeş toplaşmışdı. Amma bu dəfə rəqibin statusunu nəzərə alsaq, heç də az azarkeş olmadığını demək lazımdır. Bizi yaxşı dəstəklədilər. Əminliklə demək olar ki, onlar bu dəfə İtaliyaya azarkeşlik etməyə yox, bizi dəstəkləməyə gəlmişdilər.
- Uğurlu seriyanı Çexiya ilə oyunda da davam etdirmək mümkün olacaq?
- Çexiyanı səfərdə məğlub etmək olar. Buna inanıram.
- Çexlərin iki turdan sonra bir dənə də qələbəsi yoxdur. Sizcə, belə bir rəqibə onların meydanında qalib gəlmək olar?
- İstənilən halda meydana qələbə üçün çıxacağıq. Sizə meydana heç-heçə üçün çıxacağımızı deyə bilmərəm ki. Necə alınacaq, oyunun sonunda görəcəyik.
- Adətən, Azərbaycan yığması 3 günlük fasilə ilə keçirdiyi oyunların ikincisində həmişə zəif çıxış edir. Yorğunluq olmayacaq?
- Artıq bu tempdə oynamağa alışmaq zamanıdır. İlk dəfə deyil ki, belə oynayırıq. Yorğunluq oyunumuza təsir etməməlidir. Bərpa olunmaq üçün vaxtımız var.
- Turnir cədvəlinə baxmısınız?
- Cəmi iki oyun keçirmişik. İndidən hansısa nəticə çıxarmaq tezdir. Mən bunun tərəfdarı deyiləm.
- "Kadis"in İspaniya çempionatındakı işləri niyə heç də yaxşı getmir?
- Düzdür, mövsümün sonunda yer almaq istədiyimiz mövqedə deyilik. Amma hər şey o dərəcədə pis də deyil. Hələ mövsümün əvvəlindəyik. Bundan sonrakı oyunlarımızda vəziyyəti yaxşılaşdırmağa çalışacağıq.
- Növbəti mövsümdə sizi komandanızla birgə La Liqada görə biləcəyik?
- Bu barədə hələ dəqiq heç nə deyə bilmərəm. İspaniyanın ən güclü liqasında oynamağı mən də istəyirəm. Amma hazırda ikinci liqada çıxış edən "Kadis"dəyəm.
