Ağabala Ramazanov: AFFA prezidenti bizi Çexiyada da dəstəkləyəcəyinə söz verdi

Futbol üzrə Azərbaycan yığmasının hücumçusu Ağabala Ramazanov DÇ-2018-in seçmə mərhələsi çərçivəsində Norveç üzərində qazandıqları qələbədən (1:0) sonra aralarında azerisport.az saytının əməkdaşının da yer aldığı bir qrup jurnalistin suallarını cavablandırıb.

- Oyun barədə nə deyə bilərsiz?
- Matça yaxşı hazırlaşmışdıq. Hər şey istədiyimiz kimi alındı və vacib 3 xal qazandıq. Əminəm ki, Azərbaycan xalqını sevindirməyi bacardıq.

- Tez-tez səhvə yol verirdiniz. Bu, yığmamızın indiki heyətinə tam uyğunlaşmamağınızdan irəli gəlir?
- Elə də çox səhv etdiyimi deməzdim. Daha çox müdafiə olunduq. Bu üzdən də müdafiədən hücuma keçərkən anlaşılmazlıq olurdu. Fikrimcə, yığmamıza bu oyunda müdafiə xəttində də az faydam dəymədi.

- Bir hücumçu kimi sizin üçün belə qazonda oynamaq nə dərəcədə çətin idi?
- Qazon çox yumşaq idi. Buna görə bir az çətinliyimiz oldu.

- Əks-hücumlarda sizin üçün yaxşı boşluqlar yaransa da, bundan lazımınca istifadə edə bilmirdiniz...
- Rəqibi meydanın özümüzə aid hissəsində qəbul edirdik. 60 metr irəliləmək, norveçli futbolçulardan sıyrılmaq elə də asan deyildi. Daha çox buna çalışdım. Bir neçə dəfə uzun reyd də etdim. Amma gördüyünüz kimi, sonunu gətirmək mümkün olmadı.

- Rəqib komandanın yığmamıza yuxarıdanaşağı baxması sizin üçün nə dərəcədə faydalı oldu?
- Əsas odur ki, onlar həmin açıqlamalarının cavabını aldılar (gülür).

- AFFA prezidenti Rövnəq Abdullayev komanda ilə görüşündə nə danışdı?
- Təbrik etdi və Çexiya ilə matçda da uğur arzuladı. Bizi dəstəkləməyə gələcəyinə söz verdi.

- Çexiya ilə görüşdən nə gözləyək?
- Belə bir qələbədən sonra komandamızda çox yaxşı atmosfer var. Çexiyaya da iddialı yollanırıq.