Rahid Əmirquliyev: İki oyuna 6 xal toplamağa köklənmişik

Futbol üzrə Azərbaycan yığmasının yarımmüdafiəçisi Rahid Əmirquliyevin azerisport.az saytına müsahibəsi

- Bu gün Norveçlə oyunda millimizin əsas üstünlüyü nədə olacaq?
- Doğma meydanda oynamağımız şübhsəzi ki, əsas üstünlüyümüzdür. Ümid edirəm ki, bu oyunda böyük azarkeş ordusu bizə dəstək olacaq. Oyuna yaxşı hazırlaşmışıq.

- Yığmamıza dəvət almayan futbolçular arasında bu oyunda sizə kömək edə biləcək kimləri qeyd edə bilərsiniz?
- Bu suala cavab vermək çətindir. Belə məsələlərə məşqçilər koprusu, baş məşqçi qərar verir. Mənim bu barədə nəsə deməyim düzgün olmaz.

- Məsələn, Asif Məmmədov, Vaqif Cavadovun yığmaya dəvət almaması birmənalı qarşılanmadı...
- Adlarını qeyd etdiyiniz futbolçular son dövrlər yaxşı futbol sərgiləyirlər. Yığmada oynamağı hər bir futbolçu arzulayır. Amma nəzərə alsaq ki, bu barədə qərarı baş məşqçi verir, mənim yenə də konkret cavab verməyim yaxşı deyil.

- Bəs bu heyət Norveç yığmasını məğlub edəcək gücdədir?
- Yenə də deyirəm, bizim əsas üstünlüyümüz doğma meydanda oynamağımızdır. Bu heyətlə xalqımızı sevindirmək üçün əlimizdən gələni edəcəyik.

- Bu görüşdən sonra sizi Çexiya ilə səfər oyunu da gözləyir. Bu iki oyunda 4 xal sizin üçün normal nəticə sayıla bilər?
- İki oyundan 6 xalla ayrılmağımız daha yaxşı olardı. Məhz bu nəticəyə köklənmişik. Amma nəyə nail olacağımızı oyunlar göstərəcək.

- Rauf Əliyevlə Ramil Şeydayevin start heyətdə yer almamasını necə qarşıladınız?
- Bizim səviyyəli futbolçularımız çoxdur. Hücumçularımızın da hər biri yığmamıza kömək edəcək səviyyədədir. Hər halda onların ilk və ya sonrakı dəqiqələrdən oynamasına baxmayaraq, əllərindən gələni edəcəyinə inanıram.