Millimizin Bakı Olimpiya Stadionunda məşq etməsinə icazə verilmədi

Futbol üzrə Azərbaycan yığması DÇ-2018-in seçmə mərhələsi çərçivəsində sabah Norveçə qarşı keçirəcəyi oyun öncəsi bu gün son məşqə çıxıb. Azerisport.az xəbər verir ki, millimizin son hazırlıq prosesi matçın keçiriləcəyi Bakı Olimpiya Stadionunda baş tutmalı idi.

Amma bu qarşılaşmaya təyin olunmuş UEFA nümayəndəsi komandamızın sözügedən arenada məşq etməsinə icazə verməyib. O, qazonun daha da korlanacağından ehtiyatlandığı üçün belə qərar qəbul edib. Məsələ burasındadır ki, millimizdən təxminən bir saat öncə bu arenada məşq edən Norveç yığmasının hazırlığından sonra qazonda müəyyən problemlər yaranıb.

Bu üzdən də yığmamız stadionun ehtiyat meydançasında məşq etmək məcburiyyətində qalıb.

Qeyd edək ki, Azərbaycan - Norveç matçı sabah saat 20:00-da start götürəcək.