Rəşad Sadıqov: İstərdik ki, sabah bizi 40-50 min azarkeş dəstəkləsin

Futbol üzrə Azərbaycan yığmasının kapitanı Rəşad Sadıqov DÇ-2018-in seçmə mərhələsi çərçivəsində Norveçə qarşı oyun öncəsi mətbuat konfransında jurnalistlərin suallarını cavablandırıb. Azerisport.az xəbər verir ki, o, öncə bunları söyləyib:

- Sabah bizi seçmə mərhələdə ilk ev oyunu gözləyir. Rəqibin güclü olduğunu başa düşürük. Norveçin oyun üslubu dəyişib. Onlar indi hücumda daha sürətli oynamağa başlayıblar. Ona görə də maksimum diqqətli olmalıyıq.

- Norveçli jurnalistlərin bu mətbuat konfransına qatılmaması nədənsə xəbər vermir ki?
- Bu, bizə maraqlı deyil. Bizim jurnalistlər buradadır, yetər. Amma bir halda ki, Bakıya gəliblər, konfransa qatıla bilərdilər. Əminəm ki, onların komandası oyuna tam ciddi yanaşır. Asan olmayacaq. Güclü rəqibdir.

- "Qarabağ"ın "Qəbələ"yə qarşı matçını buraxmalı oldunuz. İndi necəsiz?
- "Fiorentina" ilə oyunda zədələndim. Amma ciddi zədə deyildi. Komanda ilə məşq edirdim. Nə dərəcədə hazır olduğumu baş məşqçi deyə bilər.

- Sabah stadionda 20 000 də azarkeş olsa, onların dəstəyini hiss etmək çətin olacaq. Sizə elə gəlmir ki, Tofiq Bəhramov adına Respublika stadionuna qayıtmaq yaxşı olardı?
- Öz aramızda da bu barədə söhbətimiz olub. Təbii ki, stadionu tam dolu görmək istəyərdik. Ümid edirik ki, çox azarkeş gələcək. Ən azı 40 və ya 50 min azarkeş görmək istəyərdik.