Hoqmo: İnanıram ki, meydança 2 il əvvəlki kimi rənglənməyəcək

Sabah DÇ-2018-in seçmə mərhələsi çərçivəsində Bakıda Azərbaycan millisi ilə qarşılaşacaq Norveç yığmasının baş məşqçisi Per-Matias Hoqmo bu gün jurnalistlərin suallarını cavablandırıb. Azerisport.az xəbər verir ki, o, öncə bunları söyləyib:

- Yenidən burada olduğumuz üçün şadam. İki il öncə də burada oynamışdıq. Azərbaycanda futbolun inkişafı bizi sevindirir. Bilirik ki, millinizin oyunçularının əksəriyyəti Avropa Liqasının qrup mərhələsində iştirak edən komandalarınızın oyunçularıdır.

- Son məşqlərdə iştirak etməyən Coşua Kinqin durumu necədir?
- Yaxşıdı, sabahkı oyuna hazırdı.

- Azərbaycana məğlubiyyət sizin üçün faciə olmayacaq?
- Biz hər oyunda qalib gəlmək istəyirik. Sabahkı matçda da belə olacaq. Amma buna nail olmaq çətin olacaq. Osloda da sizi məğlub edə bilməmişdik.

- "Bakcell Arena" və Olimpiya stadionun sizin üçün bir fərqi varmı? Nəzərə alaq ki, tərəflər arasındakı əvvəlki matç "Bakcell Arena"da baş tutmuşdu.
- Bakı Olimpiya Stadionu çox gözəldi. Fantastik arenadır. Xoşbəxtik ki, sabah bu stadionda oynayacağıq. İnanıram ki, meydança 2 il əvvəlki kimi rənglənməyəcək.

- Ötən seçmə mərhələdki Azərbaycanla indiki arasında nə fərq var?
- Komandada inkişaf göz önündədi. Yeni baş məşqçiniz iki ildir artıq burada çalışır. Əksər futbolçlarınız "Qarabağ"ın üzvüdü və bir yerdə çıxış ediblər. Təcrübəli komandadır.

- Bakıya çarter reysi ilə gəlmisiniz və buna görə də ölkənizdə tənqid olunmusunuz. Düşünmürsünüz ki, Bakıda alınacaq məğlubiyyətdən sonra daha çox tənqidlərə məruz qalacaqsınız?
- İlk dəfədi bunu sizdən eşdiriəm. Ümid edirəm ki, həmin təyyarə Bakı hava limanında bizi gözləyəcək və geriyə onunla qayıdacağıq.