Əmrah Çəlikəl: Qara zolaqda olduğumuzu düşünmürəm
"Qarabağ"ın direktoru Əmrah Çəlikəl aralarında azerisport.az saytının əməkdaşının da olduğu bir qrup jurnalistin suallarını cavablandırıb:
- Komandanın son nəticələri sizi məyus etmir?
- Belə aqibətlə hər bir klub üzləşə bilər. "Qara zolaq"da olduğumuzu düşünmürəm. Düzdür, reallıq budur ki, üç səfər oyununda bir dənə də qələbə qazana bilmədik. Amma biz bu oyunlarda pis çıxış etməmişik. "Qarabağ"ı dəstəkləmək lazımdır.
- Vəziyyətdən çıxış yolu tapmaq üçün nə planınız var?
- Əl-ələ verib, birgə bu vəziyyətdən çıxacağıq.
- Rəşad Sadıqovun U-19 komandasına baş məşqçi təyin olunmağı onun “Qarabağ”dakı çıxışına mənfi təsir göstərmir ki?
- Bu fikirlə razı deyiləm. Rəşadın həyatı futbolla bağlıdır. U-19-da köməkçiləri də var, onlar da nəzarət edir. Bunun Rəşadın məşqçilik karyerası üçün önəmli bir addım olduğunu hesab edirəm. Biz cavan futbolçularımızın önünə bir nümunə qoymuşuq. Sadıqovun orada məşqçi olması gənclərimiz üçün motivasiyadır. Həmçinin Rəşadın çıxışında düşüş olduğunu da düşünmürəm.
- "Qarabağ"ın üç qapıçısı ola-ola Emil Balayevi də aldı. Halbuki, komandanızda başqa mövqelərə, məsələn, müdafiəyə yeni oyunçu lazımdır...
- Mən Emili yeni transfer hesab etmirəm. O, yaydan bəri bizim düşərgəmizdə məşq edirdi. Sadəcə, müqavilə indi imzalandı. Emili perspektiv üçün transfer etmişik. Digər mövqelərə oyunçu almağa gəlincə, belə məsələlərə dair qərarı baş məşqçi verir.
- Bəs Balayevlə yayda niyə müqavilə imzalamadınız?
- O, Almaniya klubu ilə danışıq aparırdı. Bizdə əvəzedici komandada çıxış edəcək.
- Avropa Liqasında Yunanıstan PAOK-u ilə matçların sizin üçün həlledici olacağını demək olar?
- Layiqli nəticələrə imza atmaq istəyirik. Hazırda yeddi futbolçumuz yığma komandaların düşərgəsindədir. Amma bu, bizim hazırlığımıza təsir göstərməməlidir. Oyunun keçiriləcəyi Tofiq Bəhramov adına Respublika stadionu da yaxşı vəziyyətdədir.
- Oktyabrın 20-də qarşılaşacağınız "Sumqayıt"ı da orada qəbul edəcəksiniz?
- Hələ qərar verməmişik. Buna meydançanın vəziyyətinə uyğun qərar veriləcək.
