Rasim Ramaldanov: Millinin 2 oyuna 4 xal toplaması əla nəticə olar
Futbol üzrə Azərbaycan yığmasının sabiq müdafiəçisi, Gürcüstanın "Kolxeti" klubunda çıxış edən Rasim Ramaldanov millimizin baş məşqçisi Robert Prosineçkinin DÇ-2018-in seçmə mərhələsi çərçivəsində keçiriləcək Norveç və Çexiya ilə oyunlar üçün açıqladığı heyətlə bağlı fikirlərini bölüşüb. Azerisport.az saytına açıqlamasında o, bunları söyləyib:
"Rauf Əliyevin yığmaya qayıtması məni sevindirdi. O, ağır zədədən sonra heç də yaxşı günlər keçirmirdi. İndi isə artıq əvvəlki formasını bərpa etdiyini söyləmək olar. Ümid edirəm ki, qarşıdakı oyunlarda da özünü yaxşı tərəfdən göstərəcək. Qalan oyunçulara gəlincə, bu, məşqçilər korpusunun seçimidir. Onlar özləri üçün analizlər aparıblar, hansı oyunçuların daha faydalı olacağını müəyyənləşdiriblər. Komandamızı iki ağır matç gözləyir. Fikrimcə, Norveç və Çexiya ilə oyunlardan 4 xalla ayrılmağımız əla nəticə olardı. Bütövlükdə, komandamızın DÇ-2018-ə vəsiqə qazanmaq şanslarına gəlincə, bu, çox çətin olacaq. Bunu hamı yaxşı başa düşür. Amma niyə də yox"?
