Reynaldo: İndi ancaq bu barədə düşünürəm

"Qarabağ"ın hücumçusu Reynaldo Topaz Premyer Liqasının 7-ci turu çərçivəsində "Qəbələ"yə qarşı keçirdikləri səfər oyunundan (0:2) sonra aralarında azerisport.az saytının əməkdaşının da yer aldığı bir qrup jurnalistin suallarını cavablandırıb.

- Oyunla bağlı nə deyə bilərsiniz?
- Bu, bizim üçün çox vacib oyun idi. Qələbə qazanmaq istəyirdik. Amma birinci hissədə rəqib çoxlu qol vəziyyəti yaratdı, hətta onların ikisindən yararlandı. Buna baxmayaraq, biz toparlanmağı bacardıq. Qol vurmaq üçün şanslarımız da oldu. Topa da nəzarət etdik. Lakin təəssüf ki, qol vurmağa nail ola bilmədik.

- Komandanızın müdafiə xəttinin Rəşad Sadıqovsuz çıxışını necə qiymətləndirərdiniz?
- Hər bir oyunçu əsas heyətdə oynamaq üçün çalışır. Oyunçular arasında fərq qoymaq istəmirəm.

- İkinci hissədə meydana buraxılmağınız son dövrlərdəki zəif çıxışınızla əlaqədardır, ya Avropa Liqasında "Fiorentina" ilə İtaliyadakı oyundan yorğun qayıtmağınızla?
- Bu, baş məşqçinin qərarıdır. Mən ilk dəqiqələrdən meydanda olmağa həmişə hazıram.

- Azarkeşlərin görməyə alışdığı Reynaldo haradadır?
- Bir müddət öncəyə qədər çox ciddi zədədən əziyyət çəkirdim. O zədədən sonra hələ tam formaya düşməmişəm. İndi ancaq bu barədə düşünürəm.

- "Qəbələ" bu mövsüm çempion ola bilər?
- Onlar layiqli qələbə qazandılar. Rəqibə hörmətsizlik kimi çıxmasın, amma bu iki klub arasında fərq elə də böyük deyil. Qarşıda hələ çox oyun var.

- Tezliklə sizin Azərbaycanda yaşamağınızın 5 ili tamam olacaq. Ondan sonra siz Azərbaycan vətəndaşlığı ala, hətta millimizdə oynaya bilərsiniz...
- Burada mənə qarşı çox yaxşı münasibət var. Hər şey yaxşıdır. Formamı bərpa edib, şans gözləyəcəyəm. Yığmaya dəvət almaq, Azərbaycan xalqını sevindirmək istəyirəm.