Tale Heydərov: Bu, bütün Azərbaycan futbolunun problemidir

"Qəbələ"nin prezidenti Tale Heydərov Azərbaycan Premyer Liqasının 7-ci turu çərçivəsində "Qarabağ"a qarşı keçirdikləri oyunu şərh edib. Azerisport.az xəbər verir ki, bölgə təmsilçisinin rəhbəri 2:0 hesabıyla bitən qarşılaşmadan sonra bunları söyləyib:

- Bizim üçün vacib oyun idi. Çempiona qarşı oynayırdıq. Meydanda var gücümüzü qoyduq. Meydanda əls müharibə gedirdi. Əsas odur ki, sonda 3 xalı qazanan tərəf olduq.

- Bu oyundan sonra çempionluq şanslarınız barədə nə düşündünüz?
- Qarşıda hələ çox oyun var. Biz çempion olmaq istəyirik. Bu yolda da əsas rəqibimiz "Qarabağ"dır. Onlar üzərində qələbə bizim üçün çox vacib idi.

- Avropa Liqasında Almaniyanın "Maynts" klubuna məğlubiyyəti (2:3) necə şərh edərdiniz?
- Bu məğlubiyyətə görə çox məyus olduq. Almaniya klubunun güclü olduğunu bilirdik. Buna baxmayaraq, yaxşı oynadıq, uğur qazanmağa çalışdıq. Təəssüf ki, qələbəni əldən verdik.

- Azarkeşlər matçın 80-ci dəqiqəsindən sonra stadionu tərk etməyə başladılar. Bu baxımdan nə problem var ki?
- Bu, bütün Azərbaycan futbolunun problemidir. Təəssüf ki, bunu bütün stadionlarımızda görmək olur. Sanki, hər bir azarkeşin belə bir alışqanlığı var. Oyun 90 dəqiqədir. Hər bir azarkeş də komandasını sonadək dəstəkləməlidir. Oyunçuları paltardəyişmə otağına yola saldıqdan sonra stadionu tərk etmək olar.

- Klubunuz avrokuboklardakı ev oyunlarını nə vaxta kimi Bakıda keçirəcək?
- Bununla bağlı müəyyən planlarımız var. Stadionumuzdakı infrastrukturu daha da yaxşılaşdırmağı düşünürük. Növbəti mövsümdə avrokubok oyunlarımızı doğma arenada keçirmək üçün əlimizdən gələni edəcəyik.