Jayro: Kəpəz üzərində qələbə bizim üçün çox vacib idi

"Neftçi"nin müdafiəçisi Jayro Topaz Premyer Liqasının 7-ci turu çərçivəsində "Kəpəz"ə qarşı keçirdikləri oyundan (2:0) sonra aralarında azerisport.az saytının əməkdaşının da olduğu bir qrup jurnalistin suallarını cavablandırıb:

- Uzun fasilədən sonra qazandığınız ilk qələbə barədə nə deyə bilərsiniz?
- Ardıcıl uğursuzluqlardan sonra özümüzə gələ bilmirdik. Bizə cəmi bir qələbə lazım idi ki, bu vəziyyətdən çıxaq. "Kəpəz" üzərindəki qələbədən sonra özümüzə gəlməliyik. Bu qələbə bizim üçün çox vacib idi.

- "Neftçi" bundan sonra bütün oyunlarında qalib gələ biləcək?
- Biz hər oyuna qələbə üçün çıxırıq. Bundan sonrakı oyunlarda da sonadək mübarizə aparacağıq.

- Qarşıdakı iki həftəlik fasilə sizə necə təsir edəcək?
- Bu, bizim xeyrimizə olmalıdır. Komandanın baş məşqçisinin futbolçuları hazırlaşdırmaq üçün çox vaxtı olmamışdı. Bu fasilədən yararlanmağa çalışacağıq.

- Bəs Elxan Abdullayevin fasilə dövründə millinin düşərgəsində olacağını bilirsiniz?
- Bəli, onun yığmanın məşqçisi olduğunu bilirəm. O olmayacaq, köməkçiləri bizimlə olacaq. Digər məqçilərimiz komandanı lazım olan səviyyədə hazırlaya biləcək. Biz də bu fasilədən yararlanmağa çalışacağıq.

- Klub rəhbərliyi bu qələbəyə görə sizə mükafat verəcək?
- Biz meydanda öz işimizi görürük. Mükafat barədə heç nə bilmirəm. Buna görə də bu barədə heç nə deyə bilmərəm. Elə şeylər var ki, pulla alınması mümkün deyil. Qələbənin dadını çıxarmalıyıq.

- Abdullayev qısa müddət ərzində nəyi dəyişə bilib?
- Çox şey dəyişdiyini deməzdim. Elə həmin futbolçularla oynayırıq. Amma o, komandada özünəinamı geri qaytarıb. Hər dəfə bizi dəstəkləyir və ruhlandırır.