Dario Federiko: Kəpəzə 0:1 və 0:2 hesabıyla uduzmaq fərq etmirdi

"Kəpəz"in yarımmüdafiəçisi Dario Federiko Topaz Premyer Liqasının 7-ci turu çərçivəsində "Neftçi"yə qarşı keçirdikləri oyundan (0:2) sonra aralarında azerisport.az saytının əməkdaşının da olduğu bir qrup jurnalistə müsahibə verib.

- Birinci hissədə əla qol vəziyyətini boşa verdiniz. Həmin epizodun matçda qırılma nöqtəsi olduğunu demək olar?
- Belə deməzdim. Komandamız ilk dəqiqələrdən oyuna yaxşı köklənməmişdi. Ona görə də erkən qol buraxdıq. Uzun müddət özümüzə gələ bilmədik. Bu da sonda məğlubiyyətimizə səbəb oldu.

- Ötən mövsüm "Neftçi" ilə oyunlarınız çox maraqlı və prinsipial alınmışdı. Amma bu oyunda eyni prinsipiallığı görmədik...
- Biz bu dəfə də əlimizdən gələni etdik. Amma gördüyünüz kimi, oyunumuz alınmadı.

- İkinci qol çox kuryoz alındı. Belə olacağını gözləyirdiniz?
- Belə qol buraxan ilk komanda deyilik. 0:1 və ya 0:2 hesabıyla uduzmağın fərqi yox idi. Ona görə də böyük qüvvə ilə irəli atılmışdıq ki, ən azı 1 xal qazanaq. Qapıçı da riskə gedərək qapısını boş qoymuşdu.

- Qapıçı həmin epizoda görə günahkardır?
- Xeyr. Onun iki variantı var idi: ya qapıda qalmalı idi, ya da irəli çıxmalıydı. O da ikincini seçdi.

- "Neftçi"ni sizdən başqa demək olar ki, hamı məğlub etmişdi. Bu cür məğlubiyyət üzücü deyil?
- Premyer Liqada cəmi 8 komanda var. Rəqabət böyükdür. Komandaların çoxu eyni gücdədir. Ona görə də bu cür məğlubiyyətlər normaldır. "Neftçi"ni qələbə münasibətilə təbrik edirəm.