Araz Abdullayev: Neftçi daha yaxşı oynamağa başlayıb
"Neftçi"nin kapitanı Araz Abdullayev Topaz Premyer Liqasının 7-ci turu çərçivəsində "Kəpəz" üzərində qazandıqları 2:0 hesablı qələbədən sonra aralarında azerisport.az saytının əməkdaşının da olduğu bir qrup jurnalistə müsahibə verib.
- Sizi uzun fasilədən sonra qazandığınız qələbə münasibətilə təbrik edirik. Oyunu necə şərh edərdiniz?
- Uğursuz seriyamız var idi. Halbuki, son iki oyunda yaxşı çıxış etmişdik. Hətta hesabda öndə olduğumuz halda uduzmuşduq. Şadam ki, nəticə ilə yanaşı, həm də yaxşı oynamağa başlamışıq. Daha çox top saxlamağa, daha çox hücum etməyə başlamışıq. Asan deyildi. Lakin hiss edirəm ki, komanda son dəyişiklərdən sonra daha yaxşı çıxış etməyə başlayıb. Qarşıda iki həftəlik fasilə var. Bundan faydalanmaq lazımdır. Zəif cəhətlərimiz üzərində çalışmalıyıq.
- Komandada nə dəyişib?
- Atmosfer dəyişib. Baş məşqçi dəyişikliyi oyunumuza da təsir göstərib. Əvvəllər fərdi oyuna üstünlük verirdiksə, indi komanda olaraq mübarizə aparırıq.
- Öz oyununuz barədə nə deyə bilərsiniz?
- Kənardan necə görünürdümki? Qoy başqaları desin. Mənə də öz üzərimdə çalışmaq lazımdır. Çatışmazlıqlar olduğunu düşünürəm.
- Əsas çatışmazlığınız nədir ki?
- Bunu məşqçilərimiz daha yaxşı bilər.
- Komanda yoldaşlarınız qələbəni çox böyük coşqu ilə qeyd etdi...
- Komandamız qələbəyə ac idi. Komanda yoldaşlarıma göstərdikləri oyuna görə təşəkkürümü bildirirəm.
- Azərbaycan millisinin DÇ-2018-in seçmə mərhələsi çərçivəsində Norveç və Çexiyaya qarşı keçirəcəyi oyundan nə gözləyirsiniz?
- İlk oyun öz meydanımızda Norveçə qarşı olacaq. Buna görə qələbə qazanmalıyıq. Fikrimcə, öz meydanımızda bu rəqibə qalib gələ bilərik.
- "Neftçi"dəki vəziyyət milli komandadakı çıxışınıza təsir göstərməyəcək?
- Ümid edirəm ki, yox. Düzdür, klubda uğursuzluq olanda yığmada da çətin olur. Amma öz üzərimdə çalışacağam ki, baş məşqçi mənə şans versin.
