Roman Qriqorçuk: Mayntsa məğlubiyyətə görə təəssüflənmirəm

"Qəbələ"nin baş məşqçisi Roman Qriqorçuk Avropa Liqasının qrup mərhələsi çərçivəsində Almaniyanın "Maynts" klubuna qarşı keçirdikləri oyundan (2:3) sonra fikirlərini bölüşüb. Azerisport.az xəbər verir ki, ukraynalı mütəxəssis öncə bunları söyləyib:

"Maynts" bu gün bütün komponentlərdə bizdən yaxşı idi. Topla yaxşı davranırdılar, fiziki cəhətdən güclü idilər. Oyundan öncə də söyləmişdim ki, sakitləşmək olmaz. Rəqib qladiator kimi vuruşurdu. Mənim oyunçularım da bacardıqlarını etdi. Matçdan sonra onları təriflədim. Qüssələnməyə dəyməz. Çünki biz "Maynts"a qarşı mübarizə aparırdıq. Yaxşı ki, belə oyunlar keçiririk, öz gücümüzü görürük. Belə oyunların sayı daha çox olmalıdır. Şəxsən mən məğlubiyyətə görə təəssüflənmirəm".

Qriqorçuk rəqib komandanın əvəzetmələrdən dərhal sonra qol vurmasına da toxunub: "Qonaqlar əvəzetmələrdən sonra fəallaşdılar və bu, öz rolunu oynadı. Rəqib komandada yüksək səviyyəli oyunçuların çox olduğunu bilirdim. Komandamız belə məqamlarda necə davranmalı olduğunu öyrənməlidir. Ümumiyyətlə, irəli getmək üçün çox şeyi öyrənməliyik".

"Qəbələ"nin çalışdırıcısı buraxılan qollara görə günahkar axtarmaq istəmədiyini bildirdi: "Hər buraxılan qolda həmişə kimsə günahkar olur. Amma müdafiədə kompakt oynamaq lazımdır. Kimisə günahlandırmaq istəmirəm. Bircə onu deyə bilərəm ki, Filip Ozobiç hamıdan çox qaçdı. Amma futbolçularımın hər birinə əhsən düşür".