İsgəndər Cavadov: Bu sözlər mənim üçün çox vacib idi

Veteran futbolçumuz İsgəndər Cavadov 60 illik yubileyi ilə əlaqədar ona həsr olunmuş yeni kitabın təqdimat mərasimində fikirlərini bölüşüb. Azerisport.az xəbər verir ki, o, bunları söyləyib:

"Mənə belə bir kitabı hələ 50 illik yubileyim zamanı da həsr etmək istəyirdilər. Amma mən bunu 10 il təxirə salmalı oldum. Dostlarımın bu işdə böyük köməyi oldu. Kitab yazmaq asan iş deyil. Hələ orada hər şey öz əksini tapmayıb. Ola bilər ki, 70 illik yubileyimdə buna nail olaram (gülür).

Həyatımda çətin bir yol keçmişəm. "Neftçi"nin heyətinə çox çətinliklə düşmüşəm. Mənim dövrümdə böyük futbolçular oynayırdılar. Heydər Əliyev bizə Ələkbər Məmmədova, Kazbek Tuayevə, Anatoli Banişevskiyə bənzəməyi məsləhət görmüşdü. Bu sözlər mənim üçün çox vacib idi.

Çox danışmaq istəmirəm. Hər şey kitabda yazılıb. Qoy Azərbaycanın gənc nəsilləri bilsin ki, Azərbycanda belə futbolçular olub.

Kitabın təqdimat mərasiminə gələn hər kəsə təşəkkürümü bildirirəm. Sağ olun ki, Azərbaycan futbolu üçün gördüyüm işləri bu cür qiymətləndirirsiniz. Mən həmişə bunun üçün çalışmışam".

Veteran futbolçu "Neftçi"nin indiki durumundan da danışıb: "Klubdakı indiki vəziyyət məni də narahat edir. Amma məndən asılı olan bir şey yoxdur. Rəhbərlik vəziyyətdən çıxış yolu tapmalıdır. Orada tanınmış insanlar çalışırlar. Lazım olsa, kömək etməyə hazıram. "Neftçi" Azərbaycan futbolunun flaqmanıdır".

"Azərbaycanlı azarkeşlər ölkəmizdə nə vaxt İsgəndər Cavadov kimi futbolçu görə biləcəklər" sualına yubilyarın cavabı belə oldu: "Hələ o dövrlərdəki futbolçular səviyyəsində oyunçularımız yoxdur, görmürəm".