Rəhman Hacıyev: Ruslan Qurbanovun Neftçidən getməsini istəməzdim

"Neftçi"nin yarımmüdafiəçisi Rəhman Hacıyev Topaz Premyer Liqasının 6-cı turu çərçivəsində "Sumqayıt"a uduzduqları oyundan (1:2) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:

- Matçla bağlı fikirləriniz?
- Oyuna pis başlamamışdıq. İlk qolu da biz vurduq, hər şey yaxşı idi. Ondan sonra da qol vurmaq üçün şanslarımız oldu. Amma təəssüf ki, matçın qalan dəqiqələri bizim istədiyimiz kimi keçmədi. Nəticədə məğlub olduq. İndi biz elə vəziyyətdəyik ki, bu psixoloji səddi mütləq adlamağımıza ehtiyac var. Baş məşqçimiz də yenidir, fərqli taktika ilə oynamağımızı istəyir. Buna da alışmağımız lazımdır.

- Son iki oyunda komandanızın çox çalışdığı hiss olunur. Motivasiya da az deyil. Amma yenə nəticə qazana bilmirsiniz. İndi nə çatışmır?
- Ola bilsin ki, lazım olan anda qol vəziyyətlərindən yararlana bilməməyimiz. Vəziyyəti yaxşıya doğru dəyişmək üçün əlimizdən gələni edirik, çalışırıq.

- Bəlkə Ruslan Qurbanovun komandadan getməsi sizə təsir edib?
- Ruslan komandada olanda qol vəziyyətlərini bu qədər boşa vermirdik. O, az qol vurmurdu. Bizə faydası toxunurdu. Həm də indi heyətimizdə futbolçu çatışmazlığı var. Ehtiyat oyunçular skamyamız çox qısadır.

- Deməli, Qurbanovun göndərilməsi səhv idi?
- Bəli. O, "Neftçi"ni elə bir anda tərk etdi ki, bu, komandamızın çıxışına az təsir göstərmir. Şəxsən mən onun komandamızdan ayrılmasını istəməzdim.

- Artıq ardıcıl beş oyundur uduzursunuz. Hər dəfə meydanı məğlub tərk edəndə nə düşünürsünüz?
- Məğlubuyyətlərdən sonra bütün gecəni yata bilmirəm. Çox üzgünükü. Amma mən əminəm ki, bu xoşagəlməz vəziyyətdən çıxacağıq.

- Bəlkə komandaya psixoloq lazımdır?
- Xeyr, buna ehtiyac olduğunu düşünmürəm.