Aleksandr Deriberin: Neftçidə vəziyyətin düzəlməsi üçün zamana ehtiyac var
"Neftçi"nin yeni məşqçisi Aleksandr Deriberin artıq Bakıdadır. Azerisport.az xəbər verir ki, rusiyalı mütəxəssis bu gün "Əlincə Arena"da keçirilən "Sumqayıt"la oyunu da canlı izləyib. Qarşılaşmanın fasiləsində o, jurnalistlərin suallarını cavablandırıb:
- "Neftçi"yə gəlişiniz necə alındı?
- 2008-ci ildə Elxan Abdullayevlə Ukraynada A kateqoriyalı məşqçi kursunda olmuşuq. O vaxtdan əlaqələrimiz var idi. Bir neçə dəfə Bakıya gəlmişəm, görüşmüşük. Bir-birimizi çox yaxşı tanıyırıq və futbola baxışlarımız eynidi. Elxan müəllimdən təklif gələn kimi, razılaşdım. "Drujba"nın rəhbərliyi ilə danışıb, razılıq əldə etdik.
- Təklifi qəbul edərkən hara getdiyinizi bilirdiniz? "Neftçi"nin indiki durumu heç də ürəkaçan deyil...
- Əlbəttə, bilirdim. Vəziyyəti düzəltmək olar və mən də bunun üçün buradayam. "Neftçi" Azərbaycanın top klubudu. Hər zaman yüksək yerlər uğrunda mübarizə aparıb. Təcili vəziyyəti yaxşıya doğru dəyişmək lazımdır.
- Komanda autsayderlərdən biridir....
- Müəyyən problemlər var ki, onları aradan qaldırmaq lazımdır. İki gündü ki, klubun bazasındayam. Əsas odu ki, işgüzar ab-hava var. Bir qədər vaxt lazımdır ki, hər şey yoluna düşsün.
- Futbolçuların keyfiyyəti barədə nə deyə bilərsiniz?
- Təəssüf ki, indiki vəziyyətdə heyətlə bağlı ciddi heç bir dəyişiklik edə bilmərik. Hazırda əlimizdə olan futbolçuarla oynamaq məcburiyyətindəyik. Hələ ki, başqa şansımız yoxdur. Legionerlərin səviyyəsi haqda danışa bilmərəm. Biz heyətin gücləndirilməsi ilə bağlı işlərimizi davam etdiririk. Onların səviyyəsi barədə danışmaq istəməzdim.
- Bəs sizin dəvət etmək istədiyiniz oyunçular var?
- Bunun üzərində çalışırıq. İdeyalar var. Amma keyfiyyətli güclənməyə ehtiyac var.
- Deməli, tezliklə yeni transferlər ola bilər?
- Ümid edirik. Amma sizə bu barədə dəqiq heç nə söyləyə bilmərəm.
