Tural Axundov: Qarabağa heç nədə uduzmadıq
"Kəpəz"in kapitanı Tural Axundov Topaz Premyer Liqasının 6-cı turu çərçivəsində "Qarabağ"a qarşı keçirdikləri oyundan (1:1) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- "Kəpəz" 1 xala görə sevinir, ya 2 xal itirdiyinizi düşünürsən?
- Qələbə daha yaxşı olardı. Amma düzünü etiraf etsəm, heç-heçə də pis nəticə deyil. Komanda yoldaşlarım sağ olsunlar ki, sonadək mübarizə apardılar.
- Matçın sonunda komandanız çox yorğun görünürdü...
- Bizim üçün ikiqat çətin idi. Çünki həm güclü rəqibə qarşı mübarizə aparırdıq, həm də meydança ağır vəziyyətdə idi. Ola bilsin ki, buna görə yorğunluq gözə çarpırdı.
- "Kəpəz"in açıq futbol oynamaması, əks-hücumlara üstünlük verməsi baş məşqçi Şahin Diniyevin tapşırığı idi?
- Xeyr, biz "Qarabağ"dan çəkinmirdik. Amma rəqibi əks-hücumlarda yaxalamaq tapşırığı almışdıq. Fikrimcə, bu gün "Qarabağ"a heç nədə uduzmadıq. Əksinə, 2-3 qol şansını boşa verdik.
- Amma "Qarabağ" yaradılan qol epizodlarına görə qələbəyə daha çox layiq idi...
- Futbolda hər şey olur.
- Demək olar ki, "Kəpəz"in əsl gücü budur? Yoxsa, "Qarabağ"a qarşı ən yaxşı oyununuzu göstərə bilmədiniz?
- Xeyr, "Kəpəz"in əsl gücü bu deyil. Biz bu gün qazona görə belə oynadıq. Növbəti oyunlarda daha yaxşı oynayacağımızı siz də görəcəksiniz.
- Razısınız ki, Julien Ebah ötən mövsümkü kimi oynamır? Daha bir hücumçu almaq yaxşı olmazdımı?
- Bunu məşqçilər özü də görür. Ebah özü də qol vurmağı çox istəyir. Ona uğurlar arzulayıram. İnanıram ki, növbəti matçlarda bizi sevindirəcək.
