Emin Kürdov: Tam heyətlə Portuqaliyanı keçərdik

Futzal üzrə Azərbaycan yığmasının üzvü Emin Kürdov DÇ-2016-nın 11/4 final mərhələsi çərçivəsində Portuqaliyaya qarşı oyundan (2:2) sonra azerisport.az saytının suallarını cavablandırıb:

- Oyun barədə nə deyərdiniz?
- Portuqaliyaya qarşı oyunun çətin olacağını bilirdik. Onların heyətində çoxlu dünya səviyyəli oyunçu var. Buna baxmayaraq, yaxşı oynadıq. Sonadək mübarizə apardıq. Son dəqiqələrdə qol vurmaq üçün neçə şansımız oldu. Amma bəxtimiz gətirmədi. İstənilən halda ölkə futzalında yeni tarix yazdıq. Dünyanın 8 ən güclü komandası sırasında yer almaq böyük uğurdur.

- Heyətdəki itkilərin təsiri çox oldu?
- Bəli. Üç aparıcı oyunçunun yoxluğu istənilən komandanın çıxışına təsir göstərərdi. 99 faiz əminəm ki, tam heyətlə oynasaydıq, Portuqaliya səddini keçərdik. Belə rəqibə qarşı əvəzetməsiz oynamaq çox çətindir.

- Yəqin ki, əsas heyətlə oynasaydınız, daha çox hücum edərdiniz...
- Bəli. Müdafiədən oynamağa başladıq. Rəqibi gözləyirdik. Əks halda ilk dəqiqələrdən hücum futbolu oynayacaqdıq.

- DÇ-nin ən uğurlu oyunçularından sayılan Rövşən Hüseynlinin əvəzində qapıda durduğunuzu nəzərə alsaq, həyəcan var idimi?
- Matçın ilk 4-5 dəqiqəsində istənilən qapıçıda həyəcan olur. Amma sonradan hər şey qaydasına düşür. Oyundan öncə ailəmə də söz vermişdim ki, əlimdən gələni edəcəyəm. Fikrimcə, vəzifəmin öhdəsindən gəldim.

- Daha artığına nail ola bilməməyinizə məyus deyilsiniz?
- Əlbəttə, üzücüdür ki, mübarizəni dayandırdıq. Medal qazana bilərdik. Hətta finala da çıxa bilərdik. Amma unutmayaq ki, bizim əsas hədəfimiz 1/8 finala yüksəlmək idi. Biz isə 1/4 finala qədər irəlilədik.