Teo Uiks: Qol buraxmırıqsa, müdafiə xəttimiz güclüdür
"Qəbələ"nin yarımmüdafiəçisi Teo Uiks Topaz Premyer Liqasının 6-cı turu çərçivəsində "Zirə" üzərində qazandıqları 2:0 hesablı qələbədən sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- "Zirə" ilə oyun barədə nə deyə bilərsiniz?
- Çempion olmaq üçün hər oyunda qələbə qazanmalıyıq. Hələ ki, bu vəzifənin öhdəsindən gələ bilirik. Amma bu barədə danışmaq asandır. Hər oyunda qələbə qazanmaq isə çox çətindir.
- Altı oyunda bir dənə də qol buraxmamasınız. Bunun sirri nədədir?
- Bizə qol vura bilmirlərsə, deməli, müdafiə xəttimiz güclüdür. Müdafiədə düzgün çıxış edirik. Məhz buna görə rəqiblərimiz qapımıza yol tapa bilmirlər.
- Birinci dövrənin son oyununda "Qarabağ"la qarşılaşacaqsınız...
- "Qarabağ" çox güclü komandadır. Müdafiə xəttimizə həmin oyunda çox çətin olacaq. Onların oyununu görmüşəm. Çox yüksək səviyyəli komandadır.
- Həmin oyundan öncə sizi Avropa Liqasının qrup mərhələsinin ikinci turu çərçivəsində Almaniyanın "Maynts" klubu ilə oyun gözləyir. Amma siz həmin görüşü buraxmalı olacaqsınız...
- Buna görə çox məyusam. Oynamaq istəyirəm. Belçika "Anderlext"i ilə oyunu da televizordan izlədim. Çox çətin idi. Komandamızın yanında olmaq istəyirəm.
