Tyaqu: 13:8 normal nəticə olmasa da, vacib olan qələbə qazanmağımızdır

Futzal üzrə Azərbaycan yığmasının üzvü Tyaqu DÇ-2016-nın 1/8 final mərhələsində Tailanda qarşı keçirdikləri oyundan (13:8) sonra fikirlərini bölüşüb. Azerisport.az saytına açıqlamasında o, öncə bunları söyləyib:

"Bu, normal oyun deyildi. Xüsusilə də görüşün nəticəsi. Amma qələbə qazanmağımız çox vacib idi".

Het-trikə imza atan futbolçu sərgilədikləri oyunu belə şərh edib: "Komandamız bu gün yaxşı oynadıq. Çox futbolçumuz qol vurdu, eləcə də mən. Matçın nəticəsi dəfələrlə dəyişdi. Amma bu, futzaldı. Qalib gəldiyimiz üçün şadam. Hamımız mərhələ adladığımız üçün sevincliyik. Artıq Portuqaliya ilə oyun barədə düşünməliyik".

Tyaqu eyni zamanda matçın çox çətin keçdiyini də etiraf edib: "Çoxlu qol vursaq da, əslində çətin matç oldu. Çox yorğunam. Xüsusilə də ayaqlarım. Əlavə vaxt oynamaq çox ağırdır. Amma Portuqaliyanın da yorğun olduğunu düşünürəm. Artıq toparlanmaq və bərpa olmaq barədə düşünməliyik. Tailandla görüşü unudub, növbəti matça köklənməliyik".

Tailandla oyunda millimizin üç üzvü - Rövşən Hüseynli, Fineo və Vassura cəzalı duruma düşdüyü üçün Portuqaliyaya qarşı oynaya bilməyəcək. Tyaqu komandadakı itkilərlə də bağlı fikirlərini bölüşüb: "İtkilər barədə düşünmək lazım deyil. Onları kimlərlə əvəz etməyi düşünməliyik. Bizdə Ramiz, İsa, Xətai kimi oyunçular da var. Onlar kömək etməlidirlər. Hər birinin potensalı var".

Millimizin liderlərindən biri olan futzalçı Portuqaliya barədə də danışıb: "Çox güclü komandadır. Amma bu oyun öncəsi yaxşı məşq etməli və səhvlərimizi aradan qaldırmalıyıq. Portuqaliyanın çoxlu yaxşı oyunçusu, əla müdafiəsi var".