Rasim Ramaldanov: Gürcü klubları bizim komandalardan zəif deyil
Gürcüstanın "Kolxeti" klubunun müdafiəçisi Rasim Ramaldanovun azerisport.az saytına müsahibəsi
- Komandanız Gürcüstan kubokunun 1/8 finalında "Sioni"ylə oyunda sizin vurduğunuz qol sayəsində mərhələ adladı. Öncə bu barədə fikirlərinizi bölüşərdiniz...
- 1:0 hesablı qələbə sayəsində mərhələ adladıq. Buna görə çox sevincliyik. Amma oyun heç də asan keçmədi. Oyundakı yeganə qolu mən vurdum ki, bu da çox xoşdur.
- Azərbaycanda olarkən belə məhsuldar çıxış etmirdiniz. Amma "Kolxeti"də artıq ikinci qolunuzu vurursunuz...
- Hər şeydən öncə hər oyunda meydana çıxdığıma görə şadam. Hələ ki, iki qol vurmuşam. Amma qollarımın sayı daah çox ola bilərdi. Belə qollar vurmağımda daha çox baş məşqçinin rolu var. Çünki o, mənim ucaboy olmağımdan standart vəziyyətlər zamanı yararlanmağa çalışır. Məşqlərdə də bunun üzərində çox çalışırıq. Ümid edirəm ki, bu məhsuldarlığım davamlı olacaq.
- Komandanızın kubokdakı hədəfi nədən ibarətdir? Bu turnir vasitəsilə Avropa Liqasına vəsiqə qazana biləcəksiniz?
- Kubokda uğur qazanmağı hədəfləmişik. Öz gücümüzə inanırıq. Həm kuboku, həm də avrokuboklara vəsiqə qazanmaq barədə düşünürük.
- Gürcüstan futbolu barədə fikirləriniz maraqlıdır. Bu ölkədə legioner həyatı yaşamağa dəyərmi?
- Niyə də yox? Bu ölkənin futbolu xoşuma gəlir. Bizə münasibət də yaxşıdır. Gürcüstan futbolunun səviyyəsi yaxşıdır. Burada bütün komandalar topla oynamağı xoşlayır.
- Bəs Azərbaycan futbolu ilə müqayisə aparsaq?
- Təşkilatçılıq baxımından Azərbaycanda vəziyyət daha yaxşıdır. Amma Gürcüstan klubları bizimkilərdən zəif deyil. Baxmayaraq ki, "Qarabağ"la "Qəbələ" indi çox güclü təsir bağışlayır. Bütövlükdə götürsək, mənim üçün iki ölkə futbolu arasında ciddi müqayisə aparmaq çətindir. Çünki kimin nədə üstün olduğunu demək çətindir.
- Qışda Azərbaycana qayıtmağı düşünmürsünüz? Maraqlanan var?
- Xeyr, Azərbaycandan təklif almamışam. Amma burada artıq söhbətlər var. Ümid edirəm ki, qışda təklif gəlsə, seçim edərəm.
- Maddi baxımdan orada vəziyyətin yaxşı olmadığını nəzərə alsaq, yəqin ki, orada az qazanırsınız...
- Allaha şükür, yaşayırıq (gülür). Bundan da az maaşa oynadığım vaxtlar olub.
- Robert Prosineçki sizinlə maraqlanır?
- Lazım bilsələr, hər zaman yığmaya kömək etməyə hazıram. Amma Prosineçkinin mənimlə maraqlanıb-maraqlanmadığını siz məndən daha yaxşı bilərsiniz. Öyrənsəz, mənə də xəbər edərsiz (gülür).
