Rauf Əliyev: Hədəfimiz Avropa Liqasına vəsiqə qazanmaqdır
"İnter"in hücumçusu Rauf Əliyevin azerisport.az saytına müsahibəsi
- "Neftçi" ilə çempionat oyununuz çox dramatik alındı. Son dəqiqələrə qədər məğlub durumda olduğunuz halda iki qol vurub, əzmkar qələbə qazandınız...
- Etiraf edim ki, buraxdığımız qoldan sonra hər şeyin itirildiyini düşünməyə başlamışdım. Çünki bu görüşdə o qədər də yaxşı oynamadıq. Amma sonda hər şey bizim üçün yaxşı bitdi.
- Qarşınızdakı komanda "Qəbələ"yə 0:8 hesabıyla uduzan "Neftçi" deyildi?
- Onların bizə qarşı tamamilə fərqli oyun sərgiləyəcəyini gözləyirdim. Çünki bu klubda ciddi dəyişikliklər baş vermişdi. Bu da həmişə futbolçulara əlavə güc verir.
- Bəs əzmkar qələbəni nəyin sayəsində əldə edə bildiniz?
- Son 10 dəqiqədə ancaq hücum barədə düşünürdük. Nəticədə də qələbə bizim oldu. İkinci qol zamanı topa çata bilməyəcəyimi düşünürdüm. Amma topun yavaşladığını görüb, sürətimi artırdım. Fikrimcə, Məqsəd İsayev də həmin epizodda topun arxasınca gedəcəyimi gözləmirdi.
- İkinci qolu birinciyə nisbətən daha çılğınlıqla qeyd etdiniz...
- Doğrudan da tam fərqli hisslər keçirdim. Yəqin ki, bu qolları matçın əvvəlində vursaydım, o qədər sevinməzdim. Amma bu qolu əlavə edilmiş dəqiqələrdə oldu. Məşqçilər korpusuna, komanda yoldaşlarıma da təşəkkürümü bildirirəm. Çünki mövsümün əvvəlindən bəri qol vura bilməsəm də, onlar mənə inanmağa davam edirdilər.
- Keçmiş komandanızdakı - "Neftçi"dəki vəziyyət barədə nə deyə bilərsiniz?
- İndi ancaq "İnter" barədə düşünürəm. Digər klublarda baş verənlər haqda danışmaq istəmirəm.
- Komandanız 11 xal toplayıb və ikinci pillədədir. "Qarabağ" və "Qəbələ"yə çempionluq yolunda müqavimət göstərə biləcəksiniz?
- Biz öz yolumuzla gedirik. Hədəfimiz Avropa Liqasına vəsiqə qazanmaqdır. Hər kəsin bu mövsüm "Qarabağ"la "Qəbələ"ni favorit sayması da normaldır.
- Millinin baş məşqçisi Robert Prosineçki deyir ki, hələ Rauf Əliyev istədiyim formada deyil...
- Yığma barədə danışmaq istəməzdim. Qoy millidə oynamağa indi kim hazırdırsa, onlar da çağırılsın.
