Yığmamız son oyununda darmadağına sevindi

19 yaşadək qızlardan ibarət komandalar arasında Avropa çempionatının ilkin seçmə mərhələsinin Azərbaycanda təşkil olunan 8-ci qrupunda mübarizəyə yekun vurulub. Azerisport.az xəbər verir ki, əvvəlki oyunlarında məğlubiyyətlə üzləşmiş Azərbaycan millisi son turda özü kimi qələbəyə həsrət Latviya ilə qarşılaşıb.

Matç millimizin 4:0 hesablı qələbəsi ilə başa çatıb. Nəticədə, yığmamız bu qrupda üçüncü yeri tutub.

Qrup liderliyi uğrunda isə İspaniya və Ukrayna yığmaları mübarizə aparıb. Əvvəlki oyunlarından qalib ayrılmış kollektivlərin öz duelində ispanlar 5 cavabsız qolla qalib gələrək, yüzfaizlik nəticəyə imza atıblar.

Qeyd edək ki, Azərbaycan Ukraynaya 1:2, İspaniyaya 0:7 hesabı ilə uduzmuşdu. Latviya isə ispanlardan 18 cavabsız qol buraxdığı halda, Ukraynaya 2:5 hesabıyla uduzmuşdu.