Rauf Əliyev: Şadam ki, qol vurdum, amma bununla heç kimə nəsə sübut etmək istəmədim
"İnter"in hücumçusu Rauf Əliyev Topaz Premyer Liqasının 5-ci turunda "Neftçi"yə qarşı keçirdikləri oyundan (2:1) sonra fikirlərini bölüşüb. Azerisport.az saytına açıqlamasında o, bunları söyləyib:
"Düzünü deyim ki, qol buraxdıqdan sonra uduzacağımızı düşünməyə başlamışdım. Klubdakı dəyişikliklərdən sonra "Neftçi"nin bizə qarşı fərqli oynayacağını gözləyirdik. Adətən, baş məşqçi dəyişiklikləri zamanı məhz belə olur. Amma biz son 10 dəqiqəni tam hücumda keçirdik və qələbə qazanmağı bacardıq. Şadam ki, bu oyunda iki qol vurdum. Amma mən heç kimə nəyisə sübut etmək istəmirdim. Biz sadəcə, öz yolumuza davam edirik. "İnter" üçün hər şeydən önəmli olan avrokuboklara vəsiqə qazanmaqdır. Fikrimcə, bu mövsüm hər kəsin ancaq "Qarabağ"la "Qəbələ"dən çempionluq gözləməsi normaldır".
