Dario Melnyak: Azarkeşlərə bircə onu söz verə bilərəm ki...
"Neftçi"nin müdafiəçisi Dario Melnyak Topaz Premyer Liqasının 5-ci turu çərçivəsində "İnter"ə qarşı keçirdikləri oyundan (1:2) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Matçla bağlı nə deyə bilərsiniz?
- Əvvəlki oyunlarla müqayisədə bu görüşdə inkişaf hiss olunurdu. Amma bu dəfə xal qazanmağımız üçün azacıq bəxt yetmədi. Əsas odur ki, komanda mübarizə apardı. İndiki məqamda bu çox vacibdir.
- Bəs indiyə qədər belə oynamağa nə mane olurdu?
- Yaxşı sualdır. Amma nə deyəcəyimi bilmirəm. Çünki bunun bir sıra səbəbləri var. Bəlkə də bu gün daha inamlı çıxış etməyimiz yeni baş məşqçinin gəlişi ilə bağlıdır. Hər halda bu oyunda özümüzü daha yaxşı hiss edirdik.
- Buraxılan qollarda müdafiə xəttinizin səhvləri həlledici rol oynadı...
- Qollar həmişə səhvlər nəticəsində vurulur. Hesabda öndə olarkən üstünlüyümüzü daha da artırmaq üçün əla şanslarımız da oldu. Amma biz həmin şansları boşa verdik. Rəqib isə qısa zaman ərzində iki qol vurdu. Kimin günahkar olduğunu deyə bilmərəm. Bircə onu bilirəm ki, buraxılan səhvlərdən nəticə çıxarmağımız lazımdır.
- Mətbuatda futbolçuların "Qəbələ"yə qəsdən uduzduğu yazılır. Bu, mümkündür?
- Mən futbolçuların gözlərinə baxanda onların hər birinin oynamaq istədiyini görürdüm.
- Vəli Qasımovun sözlərinə görə, həmin gün xəstəxanada olmasaydı, komanda 8 cavabsız qolla uduzmazdı...
- Bu barədə heç nə deyə bilmərəm. Fikrimcə, həmin matçda məsələ heç də məşqçilik deyildi.
- Xalq komandası adlandırılan "Neftçi" turnir cədvəlinin son pillələrindədir. Azarkeşlərə sözünüz?
- Onlara necə çətin olduğunu bilirəm. Amma belə məğlubiyyətlər onlardan da çox bizə pis təsir edir. Azarkeşlərə bircə onu söz verə bilərəm ki, vəziyyəti düzəltməyə çalışacağıq.
