Eduardo: Azərbaycanın 1/8 finala qrup ikincisi kimi yüksəlməsi əla nəticədir

Futzal üzrə Azərbaycan yığmasının üzvü Eduardo DÇ-2016-nın qrup mərhələsində İrana qarşı keçirdikləri oyundan (3:3) sonra azerisport.az saytının suallarını cavablandırıb:

- Matçla bağlı nə deyə bilərsiniz?
- Bizi çətin oyun gözlədiyini hamımız yaxşı bilirdik. Çox yaxşı oynadıq.

- Axı bunu ilk hissəyə aid etmək olmaz. Fasiləyə qədər zəif oynamağınızın səbəbi nə idi?
- Böyük ehtimalla konsentrasiyanı itirməyimizin təsiri oldu. Buraxılan qoldan sonra daha yaxşı oynamağa başladıq. Daha bir neçə qol vurmaq şansımız da oldu.

- Rəqib sona dörd dəqiqə qalmış hesabı bərabərləşdirərkən məğlub olacağınızdan qorxmadınız?
- Yaxşı müdafiə xəttimiz var. Bunu bir daha göstərdik. Sonadək duruş gətirməyi bacardıq. Rəqibə elə də çox qol şansı vermədik. Onu da nəzərə almaq lazımdır ki, Azərbaycan dünya çempionatında ilk dəfə iştirak etdiyi halda, İranın mundiallarda böyük təcrübəsi var.

- Millimizin bütövlükdə qrup mərhələsindəki çıxışını necə qiymətləndirərdiniz?
- Biz əla nəticəyə nail olduq. Belə güclü qrupdan ikinci yerlə çıxmağı bacardıq. Mən razı qaldım.

- Qarşıda 1/8 final mərhələsi çərçivəsində Taylandla oyun var. Bu görüşdən nə gözləyirsiniz?
- Heç də sıradan rəqib deyil. Onlar qrup mərhələsində Rusiyaya uduzsalar da, çox yaxşı oynadılar. İspaniyadan olan yaxşı məşqçiləri var. Topla çox yaxşı davranırlar. Onlara qalib gəlmək çox çətin olacaq.