Araz Abdullayev: Bizim bu vəziyyətdən çıxmağa yetərli gücümüz var
"Neftçi"nin kapitanı Araz Abdullayev Topaz Premyer Liqasının 5-ci turu çərçivəsində "İnter"ə qarşı keçirdikləri oyundan (1:2) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Matçla bağlı nə deyə bilərsiniz?
- "Qəbələ"yə 0:8 hesablı məğlubiyyətdən sonra bu oyuna hazırlaşmaq çətin oldu. Klubda dəyişikliklər baş verdi. Bu matçda daha yaxşı oynadığımız hiss olunurdu. Buna rəğmən qələbə qazana bilməməyimiz pis oldu. Amma növbəti oyunlarda xallar qazanacağıq.
- Niyə komandanız toparlana bilmir?
- Komandamız hazırda "qara zolağa" düşüb. Artıq bu zolaqdan çıxmağın vaxtı çatıb.
- "Neftçi" indi autsayderlərdən biri hesab olunur...
- Təəssüf ki, hələlik, geriləyirik. Amma belə davam edə bilməz.
- Hesab 1:0 sizin xeyrinizə olarkən əla qol imkanını boşa verdiniz...
- Bəli, elədir. Qol vurmaq istəsəm də, alınmadı. Çox məyusam.
- Oyundan sonra Müşahidə Şurasının sədri Çingiz Abdullayev sizə nə dedi?
- Bizə təsəlli verdi, bildirdi ki, normal oynadınız.
- Son dəqqiələrdə iki qol buraxmağınıza nə səbəb oldu?
- Arxayınlaşdığımızı deməzdim. Sadəcə, ehtiyat oyunçular skamyamız qısadır. Bunun təsiri oldu. Mövsümə pis başlasaq da, tədricən özümüzə gəlirik. Kapitan olaraq onu deyə bilərəm ki, bizim bu vəziyyətdən çıxmağa gücümüz var.
- Bir müddət öncə sizin "Qarabağ"a keçəcəyinizə dair yayılan xəbərlər nə dərəcədə doğru idi?
- Mən də həmin xəbərləri oxumuşdum. Amma dəqiq heç bir məlumatım yoxdur. Mənim "Neftçi" ilə müqaviləm var.
