Roman Qriqorçuk: Anderlextə məğlubiyyətimiz faciə hesab olunmamalıdır
"Qəbələ"nin baş məşqçisi Roman Qriqorçukun azerisport.az saytına müsahibəsi
- Komandanız Avropa Liqasının qrup mərhələsi çərçivəsindəki ilk oyunda Belçika "Anderlext"inə məğlubiyyətdən sonra özünü necə hiss edir?
- Uduzmaq həmişə xoşagələn deyil. Amma bu məğlubiyyət bizim üçün faciə hesab olunmamalıdır. Güclü rəqibə uduzduğumuzu anlayırıq. Buna sakit yanaşırıq. Analizlər aparırıq.
- Avroliqadan sonra Topaz Premyer Liqasının növbəti turu çərçivəsində AZAL-la oyuna köklənmək çətin olmayacaq?
- Fikrimcə, hələ tam yaxşı tanımadığım bəzi oyunçularda belə problemlər ola bilər. Bunun üzərində çox çalışırıq, çox söhbətlər aparırıq. İş gedir. Bu məsələlərə ciddi yanaşmaq lazımdır.
- "Qəbələ" nəhayət ki, bu mövsüm ilk dəfə doğma meydanda oyuna çıxacaq...
- Qəbələdəki ilkin təəssüratlarımız çox yaxşıdır. Burada çox yaxşı məşq meydançalarımız var. Hamısı bir-birinə yaxındır. Qazon əla vəziyyətdədir.
- Heyətdə itki var?
- Bəli. Nika Kvekveskiri ilə Elvin Camalov bizə kömək edə bilməyəcək.
- Qarşıda sizi AZAL-la yanaşı, "Sumqayıt"la təxirə salınmış matç da gözləyir. Elə də iddialı olmayan bu rəqiblərlə oyunlarda komandanın liderlərinə istirahət verməyiniz mümkündür?
- Rəqiblərimizi güclü və ya zəifə bölmürük. Bütün komandalarla oyunlara ciddi yanaşırıq. Meydana da həmişə ən yaxşıları buraxırıq. Sadəcə, startegiyamızda gərgin qrafiki də nəzərə almağa çalışacağıq.
