Tərlan Quliyev: Neftçi bizə qarşı Qəbələ ilə görüşdəki kimi oynamayacaq

"İnter"in müdafiəçisi Tərlan Quliyev Topaz Premyer Liqasının 5-ci turu çərçivəsində "Neftçi"yə qarşı keçirəcəkləri oyun öncəsi azerisport.az saytının suallarını cavablandırıb:

- Qarşıdakı oyundan nə gözləyirsiniz?
- Çətin oyun olacaq. Çünki "Qəbələ"yə məğlubiyyətdən sonra rəqib komandada ciddi dəyişikliklər olub. Baş məşqçi postuna Elxan Abdullayev gətirildi. O, komandanın toparlanmasına nail olacaq. Bu oyuna yüksəliş matçı kimi baxırlar.

- Deməli, belə bir dönəmdə "Neftçi" ilə qarşılaşmaq sizin üçün heç də ən yaxşı variant deyil?
- Kimsə "Neftçi" ilə indiki dövrdə qarşılaşmağı bizim üçün üstünlük sayırsa, bərk yanılır. Onlar bizə qarşı "Qəbələ" ilə matçdakı kimi oynamağa hazırlaşmırlar və elə oynamayacaqlar.

- Bəs "İnter"dən nə gözləmək olar?
- Biz öz meydanımızda oynadığımız üçün yalnız 3 xal üçün çalışacağıq. Mövsümü əvvəlində qələbələr bizə çox lazımdır. Məhz indi qazanacağımız xallar bizə mövsümün sonunda çox kömək edəcək.

- "İnter"dən böyükhesablı qələbə gözləməyə dəyər?
- Hər şey ola bilər. Amma bizim üçün "Qəbələ" ilə müqayisədə çox çətin olacaq. Rəqib indi az da olsa, toparlanıb. Onların "Qəbələ"yə 8 cavabsız qolla uduzmasını heç kim gözləmirdi. Hələ də "Neftçi"nin o qədər qol buraxdığına inana bilmirəm.

- Bir neçə il öncə siz də "Neftçi"də oynamısınız...
- Onların işləri ilə xüsusi maraqlanmıram. Amma komanda hazırda özünə bənzəmir.

- Bəs "İnter"dəki durumunuzdan razısınız?
- Bütövlükdə, pis deyil. Amma "Kəpəz"lə oyunda xal itirməsəydik, daha yaxşı olardı. Həmin görüşdə qələbə qazanmalı idik.