Migel Madera: Qarabağ bu mövsüm qrupdan çıxa bilər

"Qarabağ"ın yarımmüdafiəçisi Migel Madera Avropa Liqasının qrup mərhələsi çərçivəsində Çexiya "Slovan"ına qarşı oyundan (2:2) sonra fikirlərini bölüşüb. Azerisport.az sizi həmin açıqlamalarla tanış edir:

- Qələbə qazanmağınıza nə mane oldu?
- Matçın əvvəlində səhvə yol verdim, buna görə də erkən qol buraxdıq. Amma sonradan toparlana və cavab qolunu vura bildik. Ruhdan düşmədik. Bu oyunda uduza da bilərdik. Xoşbəxtlikdən matçı heç-heçə başa vura bildik.

- Matçın sonunda demək olar ki, bütün komanda ilə hücuma atılmışdınız. "Slovan"ın daha bir qol vuracağından qorxmurdunuz?
- Bəli, bu, "Slovan"ın yeni qol vurmasına imkan yaratmışdı. Amma lazım olan qolu biz vurduq. Bu görüşdə qələbə qazanmaq istəsək də, heç-heçə də pis nəticə olmadı.

- Sizi bu oyunun qəhrəmanı saymaq lazımdır, ya antiqəhrəmanı?
- Bu oyunda komanda olaraq qəhrəmanlıq nümayiş etdirdik. Mənim təkbaşına qəhrəman olduğumu demək olmaz.

- Bu matçdakı səhvinizə görə baş məşqçi Qurban Qurbanovun qəzəbinə tuş gələcəyinizdən qorxmursunuz?
- O, həmişə bizimlədir. Pis anımızda da, yaxşı günümüzdə də bizi dəstəkləyir. Elə bu oyunda da məhz bunun nəticəsi kimi sonadək mübarizə apardıq və xal qazandıq.

- Sizcə, "Qarabağ"ın bu qrupdan çıxması mümkündür?
- Əlbəttə, bu, real görünür. Məğlub edə bilməyəcəyimiz komanda yoxdur. Öz oyunumuzu sərgiləyə bilsək, hər şey yaxşı olacaq. Bu mövsüm qrupdan çıxa bilərik.