Qurban Qurbanov: Komandadan razı qaldım
"Qarabağ"ın baş məşqçisi Qurban Qurbanov Avropa Liqasının qrup mərhələsi çərçivəsində Çexiyanın "Slovan" klubuna qarşı keçirilmiş oyundan sonra fikirlərini bölüşüb. Azerisport.az xəbər verir ki, o, öncə bunları söyləyib:
- Oyun çox çətin keçdi. Biz bu turnirə yaxşı başlamaq istəyirdik. Buna baxmayaraq, son saniyələrdə hesabı bərabərləşdirdik. Komandadan razı qaldım. Belə turnirlərdə sonadək oynamaq vacibdir. Bizim üçün yaxşı təcrübə oldu. Rəqibin ikinci qolundan sonra toparlanmaq asan deyildi. Amma oyunçularımız bunun öhdəsindən gəldilər. Bu turnirdə hər bir xal vacibdir. Asan oyunumuz olmayacaq. Hər belə oyun bizi daha da güclü edir. Sonadək mübarizə aparacağıq.
- Sizə elə gəlmir ki, hakim rəqibə simpatiya bəsləyirdi?
- Hamımıza elə göründü. Amma dəqiq belə olduğunu deyə bilmərəm. Həm də rəqib elə komandadır ki, qarşısındakına oynamağa imkan vermir.
- Bu gün Dani Kintananın oyunu getmədi?
- Ola bilər ki, bəzi epizodlarda alınmadı. Amma bütövlükdə vəzifəsinin öhdəsindən gəldi. Razı qaldım.
- Rəşad hücuma qoşulanda təhlükəli vəziyyətlər yaradırsınız. Olmaz ki, ona daha çox irəli getməyi tapşırasınız?
- Lazım olanda irəli gedir. Bunu hiss etmək lazımdır. Yetərincə təcrübəsi var və irəli getməyin nə vaxt lazım olduğunu bilir. Amma Rəşad ilk növbədə müdafiəçidir.
- Reynaldo hələ də formasını bərpa edə bilməyib. Razısınız ki, o, artıq əvvəlki Reynaldo deyil?
- Biz də ondan daha yaxşı oyun gözləyirik. O, uzun müddət zədəli idi. Tədricən artırır. Çətin də olsa, formasını bərpa etməsinə çalışırıq. Bu gün də bacardığını etdi.
- Bu gün tribunada çoxlu boş yerlər var idi...
- Biz gec saatlarda oynamaq istəsək də, UEFA oyunu bu saata saldı. Növbəti oyunlarda onların sayı daha çox olacaq.
- Hücum oyunçularınız tez-tez ofsayda düşürdü...
- Hücum futbolu oynayanda belə epizodlar çox olur. Bu da normaldır.
- Bu, mövsümün əvvəlində yaratmaq istədiyiniz komandadır?
- Hərdən düşünürük ki, biz hamıdan güclü olmalıyıq. Amma başqa klubları da nəzərə almaq lazımdır ki, onlar da eyni məqsədlər üçün çalışırlar. Hamı öz üzərində çalışır. Buna baxmayaraq, biz bütün rəqiblərimizlə baş-başa mübarizə aparmağa çalışırıq. Bu gün də qol vəziyyətlərinin sayına görə qələbə qazanmalı idik.
- Bədavi Hüseynov nə vaxt qayıdır? Elvin Yunuszadənin oyunu ürək ağrıdır...
- Onun pis olduğunu düşünmürəm. Biz də onun oyununu yaxşılaşdırmaq istəyirik. Digər variantlara gəlincə, bu, rəqiblərdən asılıdır. Müdafiədə tez-tez dəyişiklik etmək yaxşı effekt vermir. Biz də onun boyundan yararlanmağa çalışırıq. O, bu gün pis təsir bağışlamadı.
