Neftçinin yeni simaları
Xəbər verdiyimiz kimi, ötən gün "Neftçi"də bir sıra yeni təyinatlar gerçəkləşdi. Azerisport.az sizi bundan sonra paytaxt klubunun əsas simaları olacaq şəxslərlə daha yaxından tanış edir:
Klubun icraçı direktoru Elnur Eyvazov
Elnur Zakir oğlu Eyvazov 1986-cı il iyunun 24-də Gəncədə anadan olub.|
Azərbaycan Dövlət Memarlıq və İnşaat Universitetinin Tikinti inşaat və idarəetmə fakültəsinin məzunudur.
2010-2011-ci illərdə "LED Technology in Azerbaijan” şirkətinin direktoru vəzifəsində işləyib. 2010-2012-ci illərdə "Mega Sığorta” və "Luxury Motors of USA” şirkətlərinin marketinq şöbələrində çalışıb, 2014-2016-cı illərdə "CODA Travel” agentliyinin təsisçi-direktoru vəzifəsini icra edib. 2012-ci ildən "AdCo” şirkətinin təsisçi-direktoru vəzifəsində çalışır.
Azərbaycan, rus və ingilis dillərini mükəmməl bilir.
Evlidir, iki uşağı var.
Klubun idman direktoru Orxan Hüseynzadə
Orxan Əhəd oğlu Hüseynzadə 1976-cı il fevralın 15-də Bakıda anadan olub.
Bakı Dövlət Universitetinin Beynalxalq hüquq və münasibətlər fakültəsinin məzunudur.
1992-2001-ci illərdə Azərbaycan Respublikasının Konstitusiya Məhkəməsində çalışıb. 2004-cü ildə AFFA Beynəlxalq Əlaqələr Şöbəsinin baş mütəxəssisi vəzifəsində işləyib. 2004-2005-ci illərdə "Olimpik” FK-nın (hal-hazırda AZAL FK) baş direktoru, 2006-2007-ci illərdə isə "Standard” FK-nın vitse-prezidenti vəzifəsində çalışıb. 2007-2011-ci illərdə AFFA Beynəlxalq Əlaqələr şöbəsinin direktoru vəzifəsində işləyib. 2010-cu ildən Çempionlar Liqası, Avropa Liqası və Avropa çempionatının təsnifat mərhələsinin oyunlarında UEFA nümayəndəsi kimi təyinat alır.
2016-cı ildən FIFA komissarıdır.
Azərbaycan, rus və ingilis dillərini mükəmməl bilir.
Klubun inzibati işlər üzrə baş meneceri İslam Abbasov
İslam Ziyafət oğlu Abbasov 1969-cu il fevralın 22-də Bakıda anadan olub.
Azərbaycan Dövlət İqtisad Universitetinin Xalq təsərrüfatı planlaşdırması fakültəsinin məzunudur.
1986-cı ildən 2004-cü ilə qədər Dövlət Maddi-Texniki Təminat Komitəsində çalışıb. 2004-cü ildən Azərbaycan milli futbol yığma komandasının baş inzibatçı vəzifəsində çalışır.
