Qriqorçuk: Bu vəzifənin öhdəsindən gələcəyimizə inanırıq
UEFA Avropa Liqasının qrup mərhələsinin 1-ci turunun “Anderlext” (Belçika) – “Qəbələ” oyunu öncəsi “qırmızı-qaralar”ın baş məşqçisi Roman Qriqorçuk və kapitanı Rəşad Sadiqovun iştirakı ilə mətbuat konfransı keçirilib. Azerisport.az sizi onların fikirləri ilə tanış edir.
Roman Qriqorçuk bunları söyləyib: “İlk növbədə düzgün oynamağı, hücumda güclü çıxış etməyi düşünürük. İnanırıq ki, bunları bacarsaq, yaxşı nəticə qazana bilərik. “Anderlext” klubu deyil, əsas komandası və onun necə oynaması haqda danışmağım mümkündür. Rəqibi yaxşı öyrənmişik, hansı üslubda çıxış etdiyini bilirik. Belçika təmsilçisinin çox sayda güclü tərəflərini görürük. Başa düşürük ki, fərdi keyfiyyətlərə malik futbolçuları neytrallaşdırmalıyıq. Bu, çox çətin vəzifədir. Lakin bu vəzifənin öhdəsindən gələcəyimizə inanırıq. Bir neçə oyunçu deyil, rəqibin bütün hücum xəttini zərərsizləşdirməyi nəzərdə tuturam. “Anderlext”in heyətində xeyli sayda belə oyunçu var. Bu futbolçular həm fərdi, həm kollektiv oyun bacarıqları ilə seçilir. Rəqibi tanıyır, hörmətlə yanaşır, amma ondan çəkinmirik. Qrup mərhələsi üçün qlobal vəzifəmiz yoxdur. Yalnız qarşıdakı oyunu fikirləşirik. İndi “Anderlext”lə matç olacaq, ardınca addım-addım irəliləyəcəyik. Belçikada havanın istiliyini hiss etməmişik. Azərbaycandakı yaydan sonra çətin ki, burada bizə hava şəraiti mane olsun”
“Qəbələ”nin kapitanı Sadiqov da qarşıdakı matç haqda fikirlərini bildirib: “Çətin oyun olacaq. Çünki rəqib “Anderlext”dir. Bu komandanın necə təcrübəli olması hamıya məlumdur. Onlar UEFA Çempionlar Liqası və UEFA Avropa Liqasının qrupunda kifayət qədər çıxış ediblər. Buna baxmayaraq, biz də iddialıyıq. Meydana 3 xal üçün çıxacağıq. Çalışacağıq ki, qalib gələk. Bakıya ən azı xalla dönmək niyyətindəyik. Qrup mərhələsində ilk oyunumuzdur. Yaxşı nəticə ilə başlamalıyıq ki, davamı da gəlsin”.
