"Millimiz üçün belə oyunla İspaniya ilə görüş çətin olacaq"
Futzal üzrə Azərbaycan yığmasının sabiq oyunçusu Namiq Məmmədkərimov millimizin DÇ-2016-nın final mərhələsində Mərakeşə qarşı keçirdiyi ilk oyundan (5:0) danışıb, qrupdan çıxmaq şanslarını dəyərləndirib. Azerisport.az saytına açıqlamasında o, bunları söyləyib:
"Yığmamızın oyununa baxdım. Komandamız güclü təsir bağışladı. Mərakeşlilər müdafiədə çoxlu səhvə yol verdilər. Millimizin məşqçilər korpusu bu oyunda o qədər də hiss olunmadı. Fikrimcə, onların işi İspaniya və İranla görüşlərdə görünəcək. Çünki Mərakeş qeyri-adi heç nə nümayiş etdirmədi.
Məşqçilər korpusu ilk oyunda yerli futbolçulara elə də çox şans vermədilər. Legionerlərdən isə yalnız bir-ikisini fərqləndirmək olar. Fikrimcə, belə oyunla İspaniya ilə matç yığmamız üçün çox çətin keçəcək. İstənilən halda komandamıza uğurlar arzulayıram. Belə bir qrupdan çıxması komandamız üçün çox böyük uğur olar. Hətta ikinci yeri də tutmaq olar. Bunun üçün İrana qalib gəlmək lazımdır. Çempionluğu isə biz yalnız arzulaya bilərik. Fikrimcə, finala İspaniya və Braziliya çıxacaq. İtaliya ilə Rusiyanı da siyahıdan silmək olmaz. Bunlar əsas favoritlərdir".
