Voskoboynikov Azərbaycanda üzləşdiyi xoşagəlməz halları yada saldı
"Neftçi"nin sabiq hücumçusu Vladimir Voskoboynikov 2010-cu ildə oynadığı Azərbaycan karyerasından danışıb. Azerisport.az sizi həmin açıqlamalarla tanış edir:
- Ölüm halları ilə tez-tez rastlaşırsınız?
- İki dəfə. Birinci dəfə "Luçe"də oynadığım vaxt. Moskvaya yeni müqavilə imzalamağa uçmaq istəyirdim. Amma zəng edib dedilər ki, baş direktoru öldürüblər. Bu, bütün planları pozdu, klubun strukturunu tam dəyişdi.
- Bəs ikinci?
- Azərbaycanda. Səfərdə oynayırdıq. Matçdan sonra bütün komanda üzvləri avtobusda, dörd klub işçisi isə ayrıca maşında gəlirdi. Səhər tezdən öyrəndik ki, həmin maşın ağır qəzaya uğrayıb, içindəkilərdən yalnız biri sağdır. Müsəlman ənənələrinə görə dəfn mərasimi dərhal təşkil olunur. Buna görə də klubun bazasında böyük çadır quruldu, ehsan verildi, molla oturmuşdu.
- Tabutsuz dəfn etdilər?
Bəli, ağ mələfədə.
- Bakıdakı tribunalarda həmişə alov görmək olur?
- Yalnız Lənkəranda bir hadisəni xatırlayıram. Matçın sonuna beş dəqiqə qalmış yerli azarkeşlər meydana axışdılar, hakimi döydülər. Biz dərhal təhlükəsiz yerə qaçdıq. Orada təhlükəsizlik xidmətinin işçiləri, hərbçilər vardı. İki saat paltardəyişmə otağında gözlədik ki, insanlar sakitləşsinlər. Biz avtobusa oturub getmək istəsək də, məlum oldu ki, fanatlar bizi yolda gözləyirmiş. Onlar avtobusu daşa basdılar, şüşəni sındırdılar. Bir sözlə, oradan çətinliklə ayrıldıq. Bax həmin anlar qorxunc idi.
- Bakıda bazara gedirdiniz?
- Əlbəttə. Qara kürünü heç kim pulsuz verməzdi, amma quru meyvə olardı. Orada da "Neftçi-Neftçi", "Vladimir-Vladimir" qışqıranlar olurdu.
- Həyat tərzinə görə Gürcüstan Azərbaycandan çox fərqlənir?
- Azərbaycan resurslarının sayəsində daha imkanlı görünür. Amma mənə Gürcüstanda olmaq çox xoş idi. Yenidən ora qayıtmaq istəyirəm.
(Eurosport)
