Tyaqu: İspaniyaya da qarşı Mərakeşlə görüşdəki kimi oynamalıyıq

Futzal üzrə Azərbaycan yığmasının üzvü Tyaqu Kolumbiyada təşkil olunan dünya çempionatının qrup mərhələsində Mərakeş üzərində qazandıqları 5:0 hesablı qələbədən sonra azerisport.az saytının suallarını cavablandırıb:

- Mərakeş üzərində qələbə barədə nə deyərdiniz?
- Matç bizim üçün çox yaxşı alındı. Biz ələ düşən qol vəziyyətlərindən yararladıq. İnamlı qələbə qazansaq da, bu, asan başa gəlmədi. Buna baxmayaraq, yaxşı oyun sərgiləməyi bacardıq. Meydanda var gücümüzü qoyduq. Buna görə də belə nəticə alındı.

- İlk 10 dəqiqə xüsusilə çətin alındı?
- Bəli. Axı bu, bizim DÇ-də debüt oyunumuz idi. Tədricən uyğunlaşdıq və nəticədə yaxşı oynamağa başladıq.

- 5:0 qrupdan çıxmaq yolunda top fərqinin yaxşı olması baxımından da işinizə yaraya bilər...
- Bəli, bununla razıyam. Qrupdakı qalan oyunlarımızın necə alınacağını bilmirik. Amma ilk oyunda yaxşı nəticə qazanmağa nail olduq. Müdafiədə uşaqlar çox əla çıxış etdilər. Rəqibə heç bir şans vermədilər. Rövşən Hüseynlinin də çıxışını xüsusi qeyd edərdim.

- Qrupdakı şanslarınız barədə nə düşünürsünüz?
- Qrupumuz çox çətindir. Qarşıda İspaniya və İranla oyunlar var. İspanlar ümumiyyətlə bu turnirin favoritidir. Onlara qarşı Mərakeşə qarşı çıxış etdiyimiz kimi oynamağımız lazımdır. Mənə elə gəlir ki, belə oyunla biz İspaniyaya da qalib gələ bilərik.

- Həddən artıq səs-küylü açıqlama olmadımı?
- Düşünmürəm. Bizim güclü komandamız var. Düzdür, Azərbaycan hələ indiyə qədər İspaniyaya qalib gələ bilməyib. Amma niyə də buna indi nail olmayaq? Meydançada beş ispan futbolçuya qarşı bizim beş futbolçumuz mübarizə aparacaq. Odur ki, şanslar bərabərdir.