Joze Alesio: Azərbaycan DÇ-yə qələbə ilə başlaya bilər

Futzal üzrə Azərbaycan yığmasının sabiq baş məşqçisi, hazırda Qazaxıstan millisində çalışan Joze Alesio bu gün Kolumbiyadakı mundialda debüt matçına çıxacaq komandamızın şansları barədə danışıb. Azerisport.az saytına açıqlamasında o, bunları söyləyib:

"Azərbaycan digər qruplarla müqayisədə çətin qrupa düşüb. Miltinyonu tanıyıram. Bilirəm ki, güclü mütəxəssisdir. Təcrübəli mütəxəssisdir və hər bir rəqib qarşı necə oynamaq lazım olduğunu yaxşı bilir. Fikrimcə, onun komandası DÇ-nin startına tam hazır olacaq. Baxmayaraq ki, Azərbaycan yığmasının hazırlıq üçün elə də çox vaxtı olmadı. Ola bilsin ki, vaxt daha çox olsaydı, komandanız mundiala daha yaxşı hazırlaşardı. Bildiyim qədərilə, Miltinyo baş məşqçi postuna gələndən sonra yeni komanda formalaşdırıb".

"Mundialda zəif rəqib olmur. Burada zəif rəqib ümumiyyətlə yoxdur. Düzdür, 3-4 komanda var ki, DÇ-nin aşkar favoriti hesab olunurlar. Amma bu, digər komandaların zəif olduğunu söyləməyə əsas vermir. Geridə qalan iki gündə baş tutan oyunlar da göstərir ki, matçlar necə çətin keçir. Azərbaycan ilk oyununda Mərakeşlə qarşılaşacaq. Fikrimcə, komandanız mundiala qələbə ilə başlaya bilər".

"Azərbaycana həm Mərakeşlə, həm də İspaniya və İranla oyunlarda azarkeşlik edəcəyəm. Aydın məsələdir ki, ispanlara qarşı oynamaq xüsusilə çətin olacaq. Bu rəqibə qarşı mübarizə aparmaq dünyanın istənilən komandası üçün çətindir. Amma mən Azərbaycan yığmasına sonadək inanacağam. Azərbaycan mənim üçün çox doğmadır. Orada altı il yaşamıram, çoxlu qələbələrə sevinmişəm".