Petar Franyiç: Neftçiyə qol vura bilmədiyim üçün bir az məyus oldum
"Qəbələ"nin yarımmüdafiəçisi Petar Franyiç Topaz Premyer Liqasının 4-cü turu çərçivəsində "Neftçi" üzərində qazandıqları 8:0 hesablı qələbəni şərh edib. Azerisport.az saytına açıqlamasında o, bunları söyləyib:
"Bu, mənim debüt oyunum idi. Ona görə bir qədər həyəcan vardı. Amma oynamağı çox istəyirdim. Meydana da böyük istəklə çıxmışdım. 3-4 qol epizodum olsa da, vura bilmədim. Bu üzdən bir az məyusam. Buna baxmayaraq, ilk oyunum olduğunu nəzərə alsaq, hər şey normaldır. İnanram ki, qarşıdakı oyunlarda qol da vuraram.
Azərbaycana gəlməzdən əvvəl buradakı klublar barədə müəyyən şeylər eşitmişdim. Onların arasında "Neftçi" də vardı. Etiraf edim ki, bu hesabla qalib gələcəyimizi gözləmirdim. Oyundan sonra öyrəndim ki, bu klubun işləri yaxşı getmir. İstənilən halda biz layiqli qələbə qazandıq, 3 xala sahib çıxdıq. Bu nəticə Avropa Liqasının qrup mərhələsi çərçivəsində Belçika "Anderlext"i ilə oyun öncəsi bizim üçün yaxşı motivasiyadır".
